കൊച്ചി : ലോക ഫുട്ബോൾ താരം ലയണൽ മെസ്സിയെ കേരളത്തിൽ എത്തിക്കാമെന്ന് വാഗ്ദാനം ചെയ്ത് നടത്തിയ കൂറ്റൻ സാമ്പത്തിക സമാഹരണത്തിൽ ഞെട്ടിക്കുന്ന തട്ടിപ്പ് വിവരങ്ങൾ പുറത്ത്.
കായിക പ്രേമികളുടെ ആവേശത്തെ മുതലാക്കി നടത്തിയ പദ്ധതിക്ക് പിന്നിൽ കോടികളുടെ അഴിമതിയും ദുരൂഹമായ പണമിടപാടുകളുമാണെന്നാണ് ചരക്ക് സേവന നികുതി വകുപ്പിന്‍റെ പ്രത്യേക അന്വേഷണ സംഘം കണ്ടെത്തിയിരിക്കുന്നത്. പദ്ധതിയുടെ പ്രധാന സ്പോൺസറായ റിപ്പോർട്ടർ ടി വി.ബ്രോഡ്കാസ്ററിങ്ങ് കോർപ്പറേഷൻ, വിദേശത്തുനിന്നും മറ്റ് സ്ഥാപനങ്ങളിൽ നിന്നും വൻതോതിൽ പണം അനധികൃതമായി സമാഹരിച്ചതായി ഇൻ്റെലിജൻസ് വിഭാഗം കരുതുന്നു.
പ്രാഥമിക പരിശോധനയിൽ സ്പോൺസറുടെ ബാങ്ക് അക്കൗണ്ടിലേക്ക് രണ്ട് സ്വകാര്യ ധനകാര്യ സ്ഥാപനങ്ങളിൽ നിന്നായി 206 കോടിയിലധികം രൂപ എത്തിയതായി കണ്ടെത്തി. എന്നാൽ ഈ തുക കൈമാറിയതുമായി ബന്ധപ്പെട്ട് കൃത്യമായ രേഖകളോ നികുതി അടച്ചതിന്റെ തെളിവുകളോ ലഭ്യമല്ല.
ധനകാര്യ സ്ഥാപനങ്ങൾ നൽകിയ തുക വായ്പയായി നൽകിയതാണെന്ന് അവകാശപ്പെടുന്നുണ്ടെങ്കിലും ഇതിന് ആധാരമായ പണയ രേഖകളോ കരാറുകളോ ഇല്ല.അടിയന്തര പണം മാറ്റൽ: അക്കൗണ്ടിലേക്ക് തുക എത്തിയതിന് തൊട്ടുപിന്നാലെ തന്നെ ഇത് മറ്റ് വിവിധ അക്കൗണ്ടുകളിലേക്കാക്കി.
സ്പോൺസറുടെ ബാങ്ക് അക്കൗണ്ട് കേവലം ഒരു ‘ഇടനില അക്കൗണ്ട്’ ആയി കള്ളപ്പണം വെളുപ്പിക്കാൻ ഉപയോഗിച്ചതാണോ എന്ന് ചരക്ക് സേവന നികുതി വകുപ്പ് സംശയിക്കുന്നു.
വിദേശനാണ്യ നിയന്ത്രണ നിയമം തകിടം മറിച്ചാണ് പണമിടപാടുകൾ നടന്നതെന്ന സൂചനയെ തുടർന്ന് വിഷയം കേന്ദ്ര ഏജൻസികൾ അന്വേഷിക്കണമെന്നാണ് ചരക്ക് സേവന നികുതി വകുപ്പിന്‍റെ പ്രത്യേക അന്വേഷണ സംഘത്തിൻ്റെ റിപ്പോർട്ടിൽ ശുപാർശ ചെയ്യുന്നു. അതായത് എൻഫോഴ്സ്മെന്റ് ഡയറക്ടറേറ്റ് , ഇൻകം ടാക്സ് തുടങ്ങിയ ഏജൻസികൾ കേസ് ഏറ്റെടുക്കണം.
കേരളത്തിൽ ലയണൽ മെസ്സിയും അർജൻ്റീണാ ഫുട്ബോൾ ടീമും സൗഹൃദ മത്സരത്തിനായി എത്തുമെന്ന പ്രഖ്യാപനത്തോടെയാണ് ഈ വിവാദങ്ങളുടെ തുടക്കം. കോടിക്കണക്കിന് ഫുട്ബോൾ ആരാധകരുള്ള കേരളത്തിൽ ഇത്തരമൊരു വാർത്ത വലിയ തരംഗമാണ് സൃഷ്ടിച്ചത്.
മെസ്സിയെ കൊച്ചി ജവർലാൽ നെഹ്രു അന്താരാഷ്ട സ്റ്റേഡിയത്തിൽ എത്തിക്കുന്നതിനായി സ്വകാര്യ ഏജൻസികളും സ്പോൺസർമാരും മുന്നോട്ടുവരികയും വലിയ രീതിയിൽ പരസ്യ പ്രചാരണം നടത്തുകയും ചെയ്തു. സർക്കാരിൻ്റെയും വിവിധ കായിക സംഘടനകളുടെയും പിന്തുണയുണ്ടെന്ന മട്ടിലായിരുന്നു പ്രചാരണം.
മത്സരത്തിന്റെ നടത്തിപ്പിനായി നൂറുകണക്കിന് കോടി രൂപ ചെലവ് വരുമെന്ന് കാണിച്ച് ടിക്കറ്റ് അഡ്വാൻസ് ബുക്കിംഗ്, പ്രാദേശിക സ്പോൺസർഷിപ്പുകൾ, കോർപ്പറേറ്റ് ഫണ്ടിംഗ് എന്നിവ വഴി വ്യാപകമായി പണം പിരിച്ചു.
പറഞ്ഞ തീയതികളിൽ മത്സരം നടക്കാതിരിക്കുകയും അർജൻ്റീനാ ഫുട്ബോൾ അസോസിയേഷൻ ഔദ്യോഗികമായി ഇത്തരമൊരു കരാറിനെക്കുറിച്ച് വ്യക്തത വരുത്താതിരിക്കുകയും ചെയ്തതോടെയാണ് ആരാധകർക്കിടയിലും ഉദ്യോഗസ്ഥർക്കിടയിലും സംശയം ഉടലെടുത്തത്.
കോടികളുടെ ധനസമാഹരണം നടന്നിട്ടും അതിന്മേൽ കൃത്യമായ ജിഎസ്ടിയോ മറ്റ് നികുതികളോ ഒടുക്കിയില്ലെന്ന് കണ്ടതോടെയാണ് ജിഎസ്ടി ഇൻ്റെലിജൻസ് വിഭാഗം അന്വേഷണം ആരംഭിക്കുകയായിരുന്നു
സ്പോൺസറുടെ സാമ്പത്തിക സ്രോതസ്സുകളെക്കുറിച്ചും ബാങ്ക് അക്കൗണ്ട് വിവരങ്ങളെക്കുറിച്ചും അന്വേഷണം പൂർത്തിയാക്കിയ ജിഎസ്ടി സ്പെഷ്യൽ ടീം വിശദമായ റിപ്പോർട്ട് ഉന്നത ഉദ്യോഗസ്ഥർക്ക് സമർപ്പിച്ചിട്ടുണ്ട്.
ഈ റിപ്പോർട്ടിൻ്റെ അടിസ്ഥാനത്തിൽ കള്ളപ്പണം വെളുപ്പിക്കൽ തടയൽ നിയമപ്രകാരം വരും ദിവസങ്ങളിൽ കേന്ദ്ര അന്വേഷണ ഏജൻസികൾ സ്പോൺസർമാർക്കും ധനകാര്യ സ്ഥാപനങ്ങൾക്കുമെതിരെ നടപടി ശക്തമാക്കുമെന്നാണ് സൂചന.
