വിയന്ന: മയക്കുമരുന്ന് കേസിൽ പ്രതിക്ക് വേണ്ടി ഓസ്ട്രിയയിലെ ജയിൽ പ്രതിദിനം ചെലവഴിക്കുന്നത് ഏകദേശം 1.6 ലക്ഷം രൂപ.
സാധാരണ തടവുകാരന് ചെലവാക്കുന്നതിന്റെ പത്ത് മടങ്ങ് തുക. 29 വയസ്സുകാരനായ ഇയാൾക്ക് 300 കിലോഗ്രാം ഭാരവുമുണ്ട്.നികുതിദായകരുടെ പണം ഒരു മയക്കുമരുന്ന് കുറ്റവാളിക്ക് വേണ്ടി ഇത്രയധികം ചെലവഴിക്കുന്നതിനെതിരെ രാജ്യത്ത് ശക്തമായ പ്രതിഷേധം ഉയർന്നു കഴിഞ്ഞു.
സാധാരണ പൗരന്മാർക്ക് സർക്കാർ ആശുപത്രിയിൽ ഡോക്ടറെ കാണാൻ മാസങ്ങളോളം കാത്തിരിക്കേണ്ടി വരുന്നുണ്ടത്രെ. എന്നാൽ, ഒരു കുറ്റവാളിയെ പരിചരിക്കാൻ 24 മണിക്കൂറും നഴ്സുമാർ ലഭ്യമാണെന്നത് ജനങ്ങളെ പ്രകോപിപ്പിക്കുന്നു.
ഇയാളുടെ വീട്ടിൽ നിന്ന് 45 കിലോഗ്രാം കഞ്ചാവ്, 2 കിലോഗ്രാം കൊക്കെയ്ൻ, ഏകദേശം 2 കിലോഗ്രാം ആംഫെറ്റാമൈൻ, 2,000-ത്തിലധികം എക്സ്റ്റസി ഗുളികകൾ എന്നിവ പിടിച്ചെടുത്തിരുന്നു. ഇതിന് പിന്നാലെയാണ് പോലീസ് അറസ്റ്റ് ചെയ്തത്.
പേര് വെളിപ്പെടുത്താത്ത ഈ തടവുകാരനെ ആദ്യം വിയന്നയിലെ ജോസഫ്സ്റ്റാഡ് ജയിലിലാണ് പാർപ്പിച്ചിരുന്നത്. എന്നാൽ ജയിലിലെ കിടക്കയ്ക്ക് ഇയാളുടെ ഭാരം താങ്ങാനാവാത്തതിനാൽ അത് വളഞ്ഞു.തുടർന്ന്, ഇയാളെ തലസ്ഥാനത്ത് നിന്ന് 15 കിലോമീറ്റർ അകലെയുള്ള കോർണ്യൂബർഗ് ജയിലിലേക്ക് മാറ്റി.
കോർണ്യൂബർഗ് ജയിലിൽ ഇയാൾക്ക് വേണ്ടി പ്രത്യേകം തയ്യാറാക്കിയ കട്ടിലാണ് ഇപ്പോൾ ഉപയോഗിക്കുന്നത്. കൂടാതെ, 24 മണിക്കൂറും നഴ്സുമാരുടെ പരിചരണവും ലഭ്യമാണ്. ഒരു സാധാരണ തടവുകാരന് ഒരു ദിവസം 180 യൂറോ (ഏകദേശം 16,000 രൂപ) മാത്രമാണ് ചെലവ് വരുന്നതെങ്കിൽ, ഈ തടവുകാരന് വേണ്ടി മാത്രം പ്രതിദിനം 1,800 യൂറോ (ഏകദേശം 1.6 ലക്ഷം രൂപ) ചെലവഴിക്കുന്നുണ്ടെന്ന് ജുഡീഷ്യൽ വൃത്തങ്ങൾ പറയുന്നു.
