ന്യൂഡല്ഹി: നിരോധിത സംഘടനയായ പോപ്പുലർ ഫ്രണ്ട് ഓഫ് ഇന്ത്യയുടെ രാഷ്ടീയ വിഭാഗം എന്ന് ആരോപിക്കപ്പെടുന്ന എസ്ഡിപിഐയെ നിരോധിക്കുമെന്ന വാർത്തകൾക്കിടെ അവരുടെ ഓഫീസുകളിൽ എന്ഫോഴ്സ്മെന്റ് ഡയറക്ടറേറ്റിന്റെ (ഇഡി) പരിശോധന.
കള്ളപ്പണം വെളുപ്പിക്കല് കേസുമായി ബന്ധപ്പെട്ട് രാജ്യത്തെ പന്ത്രണ്ട് സ്ഥലങ്ങളിലെ ഓഫീസുകളില് ആണ് മിന്നൽ തിരച്ചിൽ.ഡല്ഹിയിലെ പാര്ട്ടി ആസ്ഥാനം, തിരുവനന്തപുരം, മലപ്പുറം, ബംഗളൂരു, ആന്ധ്രാപ്രദേശിലെ നന്ത്യാല്, താനെ, ചെന്നൈ, ഝാര്ഖണ്ഡിലെ പാക്കൂര്, കൊല്ക്കത്ത, ജയ്പൂര്, ലഖ്നൗ എന്നിവിടങ്ങളിലാണ് ഈ നടപടി.
കഴിഞ്ഞ ദിവസം കള്ളപ്പണം വെളുപ്പിക്കല് കേസില് എസ്ഡിപിഐ ദേശീയ അധ്യക്ഷന് എം.കെ. ഫൈസിലെ ഇഡി അറസ്റ്റ് ചെയ്തിരുന്നു. ഇതിന് പിന്നാലെയാണ് എസ്ഡിപിഐ കേന്ദ്രങ്ങളിലെ പരിശോധന.
എം.കെ. ഫൈസി
പോപ്പുലര് ഫ്രണ്ട് തന്നെയാണ് എസ്ഡിപിഐയെ നിയന്ത്രിക്കുന്നതെന്ന് ഇഡി കണ്ടെത്തിയിരുന്നു. എസ്ഡിപിഐയ്ക്ക് പണം നല്കുന്നതും നയങ്ങള് രൂപീകരിക്കുന്നതും പോപ്പുലര് ഫ്രണ്ട് തന്നെയാണെന്നും രണ്ടു സംഘടനയുടെയും പ്രവര്ത്തകരും ഒന്നു തന്നെയാണെന്നും ഇഡി പറയുന്നു.
രാജ്യത്തിനകത്തും പുറത്തും നിന്ന് അനധികൃതമായി പണം കൈപ്പറ്റി ഭീകരപ്രവര്ത്തനങ്ങള്ക്ക് നേതൃത്വം നല്കിയെന്ന് കണ്ടെത്തലിന്റെ അടിസ്ഥാനത്തില് നിയമവിരുദ്ധ പ്രവര്ത്തന നിരോധന നിയമപ്രകാരം 2022 സെപ്റ്റംബര് 28നാണ് പോപ്പുലര് ഫ്രണ്ടിനെ കേന്ദ്ര ആഭ്യന്തര മന്ത്രാലയം നിരോധിച്ചിരുന്നു. 2009ല് സ്ഥാപിതമായ എസ്ഡിപിഐയുടെ ആസ്ഥാനം ഡല്ഹിയാണ്.
