ന്യൂഡല്ഹി:നവംബർ 25ന് ആരംഭിക്കുന്ന പാർലമെൻ്റിൻ്റെ ശീതകാല സമ്മേളനത്തിൽ വഖഫ് നിയമ ഭേദഗതി ബിൽ അവതരിപ്പിക്കാനിരിക്കെ, വഖഫിന് എതിരെ രൂക്ഷവിമര്ശനവുമായി പ്രധാനമന്ത്രി നരേന്ദ്ര മോദി രംഗത്ത്.
സാമൂഹിക നീതിക്ക് എതിരാണ് വഖഫ് എന്ന് അദ്ദേഹം പറഞ്ഞു.വോട്ട് ബാങ്ക് വര്ധിപ്പിക്കാനാണ് വഖഫ് നിയമം ഉണ്ടാക്കിയത്. ഭരണഘടനയില് വഖഫിന് സ്ഥാനമില്ല.ന്യൂഡല്ഹിയിലെ ബിജെപി ആസ്ഥാനത്ത് പ്രവര്ത്തകരോട് സംസാരിക്കുകയായിരുന്നു അദ്ദേഹം.
പ്രീണനത്തിനായി കോണ്ഗ്രസ് നിയമങ്ങള് ഉണ്ടാക്കി. പട്ടികജാതി വിഭാഗത്തെപ്പോലും അവര് കാര്യമാക്കിയില്ല. വഖഫ് ബോര്ഡ് അതിന് ഉദാഹരണമാണ്. 2014ല് ഡല്ഹിക്ക് സമീപമുള്ള പല സ്വത്തുക്കളും ഒഴിപ്പിച്ച് ഇവര് വഖഫ് ബോര്ഡിന് വിട്ടുകൊടുത്തു.
ഒരു കുടുംബത്തിന് വോട്ട് ബാങ്ക് ഉണ്ടാക്കാനാണ് കോണ്ഗ്രസ് ഈ സൗകര്യം ഒരുക്കിയത്. യഥാര്ത്ഥ മതേതരത്വത്തിന് വധശിക്ഷ നല്കാനാണ് കോണ്ഗ്രസ് ശ്രമിച്ചത്.- മോദി പറഞ്ഞു.
