മുംബൈ: വിപണിയിൽ നിരവധി സൂപ്പർഫുഡുകൾ ലഭ്യമാണെങ്കിലും അവയിൽ ഭൂരിഭാഗവും വെറും പരസ്യപ്രചാരണങ്ങൾ മാത്രമാണെന്നാണ് ആരോഗ്യ വിദഗ്ധരുടെ നിരീക്ഷണം.
എന്നാൽ യഥാർത്ഥത്തിൽ ‘പോഷകാഹാര പവർഹൗസ്’ എന്ന് വിളിക്കാൻ യോഗ്യതയുള്ള ഒന്നാണ് വാൽനട്ട് എന്ന് പ്രമുഖ കാർഡിയോളജിസ്റ്റ് ഡോ. അലോക് ചോപ്ര വ്യക്തമാക്കുന്നു. ആരോഗ്യകരമായ വാർദ്ധക്യം, തലച്ചോറിന്റെ പ്രവർത്തനം, ഹൃദയാരോഗ്യം എന്നിവയ്ക്ക് ഏറ്റവും അനുയോജ്യമായ ഒന്നാണ് ഈ ചെറുഭക്ഷണം .
ന്യൂഡൽഹിയിലെ ആഷ്ലോക് ആശുപത്രിയിലെ സ്ഥാപക ഡയറക്ടറും 40 വർഷത്തിലേറെ പരിചയസമ്പത്തുള്ള കൺസൾട്ടൻ്റെ് കാർഡിയോളജിസ്റ്റുമായ ഡോ. അലോക് ചോപ്ര, ഇൻസ്റ്റാഗ്രാമിലൂടെ പങ്കിട്ട ഒരു വീഡിയോയിലാണ് വാൽനട്ടിൻ്റെ അസാധാരണമായ ഗുണങ്ങളെക്കുറിച്ച് സംസാരിച്ചത്. ദിവസവും ഒരു പിടി വാൽനട്ട് കഴിക്കുന്നത് ശരീരത്തിന്റെ മൊത്തത്തിലുള്ള അരോഗ്യത്തിന് എങ്ങനെ കാരണമാകുമെന്ന് ശാസ്ത്രീയമായ തെളിവുകളുടെ അടിസ്ഥാനത്തിൽ അദ്ദേഹം വിശദീകരിക്കുന്നു.
ശരീരത്തിലുണ്ടാകുന്ന വിട്ടുമാറാത്ത വീക്കം ആണ് ഇന്ന് കാണുന്ന മിക്ക ആരോഗ്യ പ്രശ്നങ്ങൾക്കും കാരണം. മോശം മെറ്റബോളിക് ആരോഗ്യം, തലച്ചോറിലെ മൂടൽമഞ്ഞ് , ഉയർന്ന കൊളസ്ട്രോൾ, പെട്ടെന്നുള്ള വാർദ്ധക്യം എന്നിവയുടെയെല്ലാം പ്രധാന കേന്ദ്രബിന്ദു ഈ വീക്കമാണ്. വെറും 28 ഗ്രാം (ഒരു പിടി) വാൽനട്ടിൽ 2.5 ഗ്രാം സസ്യാധിഷ്ഠിത ഒമേഗ-3 ഫാറ്റി ആസിഡുകൾ അടങ്ങിയിട്ടുണ്ട്.
ഇത് ശരീരത്തിലെ വീക്കങ്ങളെ ശക്തമായി ചെറുക്കുന്നു. ഇതിലൂടെ ഹൃദയാരോഗ്യം മെച്ചപ്പെടുകയും, വൈജ്ഞാനിക ശേഷി വർദ്ധിക്കുകയും, കുടലിന്റെ ആരോഗ്യം സംരക്ഷിക്കുകയും ചെയ്യുന്നു. കൂടാതെ, ഇത് രക്തസമ്മർദ്ദം നിയന്ത്രിക്കാനും ഭാവിയിൽ ഹൃദ്രോഗ സാധ്യത കുറയ്ക്കാനും സഹായിക്കും. ആരോഗ്യകരമായ കൊഴുപ്പുകൾ അടങ്ങിയതും കാർബോഹൈഡ്രേറ്റ് കുറഞ്ഞതുമായ വാൽനട്ട് ശരീരത്തിന് നല്ല രീതിയിൽ പോഷണം നൽകുന്നു.
ഉയർന്ന ഗുണനിലവാരം, മനോഹരമായ സ്വർണ്ണ നിറം, മികച്ച രുചി എന്നിവ കണക്കിലെടുത്ത് കാലിഫോർണിയ വാൽനട്ടുകളാണ് ഡോ. ചോപ്ര പ്രധാനമായും ശുപാർശ ചെയ്യുന്നത്. വാൽനട്ട് വെറുതെ പച്ചയായി കഴിക്കാൻ മാത്രമല്ല, ദൈനംദിന ഭക്ഷണശൈലിയുടെ ഭാഗമാക്കാനും വളരെ എളുപ്പമാണ്.
പോഷകഗുണം കൂട്ടാനായി ഇത് ഓട്സ്, സ്മൂത്തികൾ എന്നിവയിൽ ചേർക്കാം. കൂടാതെ തൈര് ചോറ്, ചാറ്റ്, മില്ലറ്റ് ഉപ്പുമാവ് എന്നിവയിലും ഇത് ഉൾപ്പെടുത്താവുന്നതാണ്. മുതിർന്നവർക്ക് മാത്രമല്ല, കുട്ടികളുടെ ഭക്ഷണത്തിലും വാൽനട്ട് കൂടുതൽ ധാരാളമായി ഉൾപ്പെടുത്തണമെന്ന് ഡോ. ചോപ്ര നിർദ്ദേശിക്കുന്നു. അളവിൽ ചെറുതാണെങ്കിലും അസാധാരണമായ ആരോഗ്യഗുണങ്ങളാണ് ഈ സൂപ്പർഫുഡ് പ്രദാനം ചെയ്യുന്നത്.
