കൊച്ചി : നിയമസഭാ തിരഞ്ഞെടുപ്പില് ഐക്യജനാധിപത്യ മുന്നണി മുന്നിലെത്തുമെന്ന് മനോരമന്യൂസ് സി–വോട്ടര് മെഗാ ഇലക്ഷന് സര്വേ പ്രവചിക്കുന്നു. 140 നിയമസഭാ മണ്ഡലങ്ങളില് തൊണ്ണൂറായിരത്തോളം സാംപിളുകള് ഉപയോഗിച്ചായിരുന്നു സര്വേ.
യുഡിഎഫ്, 69 മുതല് 81 വരെ സീറ്റുകള് നേടിയേക്കാമെന്നാണു പ്രവചനം. 57 മുതല് 69 സീറ്റുകള് വരെ ഇടതുമുന്നണിക്കു ലഭിക്കാം. ഒന്നുമുതല് അഞ്ച് സീറ്റ് വരെയാണ് എന്ഡിഎയ്ക്ക് കിട്ടാം.
തിരുവനന്തപുരത്തെ നേമത്ത് ബിജെപി അധ്യക്ഷന് രാജീവ് ചന്ദ്രശേഖറിനാണ് വിജയസാധ്യതയെന്നു സര്വേ പറയുന്നു. കഴക്കൂട്ടം മണ്ഡലത്തില് മുന് കേന്ദ്രമന്ത്രി വി.മുരളീധരനും നേരിയ സാധ്യതയുണ്ട്.നേമത്തും കഴക്കൂട്ടത്തും ശക്തമായ ത്രികോണമല്സരമാണ്.
14 നിയമസഭാമണ്ഡലങ്ങളുള്ള തിരുവനന്തപുരം ജില്ലയില് 8 മുതല് 10 സീറ്റ് വരെ ഇടതുമുന്നണിക്ക് ലഭിക്കുമെന്നാണ് സര്വേ ഫലം. യുഡിഎഫിന് 2 മുതല് 4 സീറ്റ് വരെയാണ് പ്രവചനം. എന്ഡിഎയ്ക്ക് ഒന്നുമുതല് മൂന്ന് സീറ്റുവരെ പ്രതീക്ഷിക്കാമെന്നും പറയുന്നുണ്ട്.
ആലപ്പുഴ ജില്ലയിൽ എൽഡിഎഫിന് ആധിപത്യമെന്ന് പ്രവചനം. എൽഡിഎഫിന് 6 മുതൽ 8 വരെയും യുഡിഎഫിന് ഒന്നു മുതൽ മൂന്നുവരെയും സീറ്റുകള് ലഭിച്ചേക്കും.
പത്തനംതിട്ടയിൽ എൽഡിഎഫിന് ആധിപത്യം നഷ്ടമായേക്കും. 2021ൽ ജില്ലയിലെ അഞ്ചു നിയമസഭാ മണ്ഡലങ്ങളിലും എൽഡിഎഫായിരുന്നു വിജയിച്ചത്. യുഡിഎഫിന് 3 മുതല് 5 സീറ്റ് വരെയാണ് പ്രവചിക്കുന്നത്. പൂജ്യം മുതല് രണ്ട് സീറ്റ് വരെ ഇടതുമുന്നണിക്ക് ലഭിച്ചേക്കാം. എന്ഡിഎയ്ക്ക് ഇക്കുറിയും ജില്ലയില് ജയസാധ്യതയില്ല.
കൊല്ലം ജില്ലയില് ഇക്കുറി ഇടത് തരംഗമുണ്ടാവില്ലെന്നാണു പ്രവചനം. എന്നാല് യുഡിഎഫിനെക്കാള് മെച്ചപ്പെട്ട പ്രകടനം ഇത്തവണയും എല്ഡിഎഫ് കാഴ്ചവയ്ക്കും. ഇടതുമുന്നണിക്ക് അഞ്ചുമുതല് ഏഴ് സീറ്റ് വരെയും യുഡിഎഫിന് നാലു മുതല് ആറ് സീറ്റ് വരെയും ലഭിച്ചേക്കാമെന്നും പ്രവചനമുണ്ട്.
