ന്യൂഡൽഹി : അമേരിക്കയിലെ ശതകോടീശ്വരനായ വ്യവസായി ഇലോൺ മസ്കിൻ്റെ സാറ്റലൈറ്റ് ഇൻ്റർനെറ്റ് സേവനമായ സ്റ്റാർലിങ്കിന് അനുമതി നൽകുന്ന കാര്യത്തിൽ കേന്ദ്ര സർക്കാർ കടുത്ത ജാഗ്രത പാലിക്കുന്നത് വിവാദമായി.
ഉപഗ്രഹ ഇൻ്റർനെറ്റ് രംഗത്ത് വലിയ വിപ്ലവങ്ങൾ സൃഷ്ടിച്ച കമ്പനിയാണെങ്കിലും, രാജ്യത്തിന്‍റെ സുരക്ഷയുമായി ബന്ധപ്പെട്ട ആശങ്കളാണ് കേന്ദ്ര സർക്കാരിനെ പ്രധാനമായും പിന്നോട്ടുവലിക്കുന്നത്.
മുമ്പ് ഇറാനിൽ ഉണ്ടായ രാഷ്ട്രീയ പ്രക്ഷോഭങ്ങളുടെ സമയത്ത് സ്റ്റാർലിങ്ക് സ്വീകരിച്ച നിലപാടുകളാണ് ഈ സുരക്ഷാ ആശങ്കകൾക്ക് പ്രധാന കാരണം. ഇറാൻ സർക്കാർ രാജ്യത്ത് ഇൻ്റർനെറ്റ് ബന്ധം വിച്ഛേദിച്ചപ്പോൾ, പ്രാദേശിക നിയമങ്ങളെയും പരമാധികാരത്തെയും മറികടന്ന് മസ്ക് അവിടെ സ്റ്റാർലിങ്ക് സേവനങ്ങൾ ലഭ്യമാക്കി.
ഒരു രാജ്യത്തിന്‍റെ അനുമതിയില്ലാതെ ഉപഗ്രഹ നെറ്റ്‌വർക്കുകൾ പ്രവർത്തിപ്പിക്കാനും ഭരണകൂടത്തിന്‍റെ നിയന്ത്രണങ്ങൾ മറികടക്കാനും കഴിയും എന്ന് തെളിയിക്കപ്പെട്ടതോടെയാണ് സ്റ്റാർലിങ്കിനെക്കുറിച്ച് പല രാജ്യങ്ങളും ആശങ്കാകുലരായത്.
സമാനമായ രീതിയിൽ ഇന്ത്യയുടെ സുരക്ഷാ ഏജൻസികളുടെയോ പ്രാദേശിക നിയമങ്ങളുടെയോ നിയന്ത്രണത്തിലല്ലാത്ത സാങ്കേതികവിദ്യ രാജ്യത്ത് എത്തുന്നത് ഭാവിയിൽ വെല്ലുവിളിയാകുമെന്നാണ് അധികൃതരുടെ വിലയിരുത്തൽ.
സേവനം ആരംഭിക്കുന്നതിന് മുൻപായി സുരക്ഷാ പരിശോധനകൾ പൂർത്തിയാക്കാനും ഡാറ്റ മുഴുവൻ ഇന്ത്യയിൽ തന്നെ സൂക്ഷിക്കാനും കേന്ദ്ര സർക്കാർ കമ്പനിയോട് ആവശ്യപ്പെട്ടിട്ടുണ്ട്. അതോടൊപ്പം ഇന്ത്യൻ രഹസ്യാന്വേഷണ ഏജൻസികൾക്ക് ആവശ്യമായ നിരീക്ഷണ സഹായങ്ങൾ ഉറപ്പാക്കണമെന്നും സർക്കാർ വ്യക്തമാക്കിയിട്ടുണ്ട്.
ഇതിനിടയിലാണ് സാറ്റലൈറ്റ് സ്പെക്ട്രം അനുവദിക്കുന്നതുമായി ബന്ധപ്പെട്ട് ഇലോൺ മസ്കും റിലയൻസ് മേധാവി മുകേഷ് അംബാനിയും തമ്മിലുള്ള തർക്കം ഉടലെടുത്തത്. ഉപഗ്രഹ ഇൻ്റർനെറ്റിനായുള്ള സ്പെക്ട്രം ലേലം വിളിക്കാതെ നേരിട്ട് അനുവദിക്കണമെന്ന് മസ്ക് വാദിച്ചപ്പോൾ, പരമ്പരാഗത ടെലികോം കമ്പനികൾക്ക് തുല്യമായി ലേലത്തിലൂടെ മാത്രമേ സ്പെക്ട്രം നൽകാവൂ എന്ന് അംബാനി ആവശ്യപ്പെട്ടു.
ആഗോളതലത്തിൽ പിന്തുടരുന്ന രീതി അനുസരിച്ച് ലേലമില്ലാതെ സ്പെക്ട്രം അനുവദിക്കണമെന്ന മസ്കിൻ്റെ നിലപാടിനാണ് കേന്ദ്ര സർക്കാർ ഒടുവിൽ പിന്തുണ നൽകിയത്. അന്താരാഷ്ട്ര ടെലികമ്മ്യൂണിക്കേഷൻ യൂണിയന്‍റെ മാർഗ്ഗനിർദ്ദേശങ്ങൾ മുൻനിർത്തി അഡ്മിനിസ്ട്രേറ്റീവ് രീതിയിൽ സ്പെക്ട്രം വിതരണം ചെയ്യുമെന്ന് ടെലികോം മന്ത്രി സ്ഥിരീകരിക്കുകയും ചെയ്തു.
എങ്കിലും വാണിജ്യപരമായ ഇത്തരം ഇളവുകൾ നൽകുമെങ്കിലും ദേശീയ സുരക്ഷയുടെ കാര്യത്തിൽ യാതൊരു വിട്ടുവീഴ്ചയ്ക്കും തയ്യാറല്ലെന്ന കർശന നിലപാടിലാണ് കേന്ദ്ര സർക്കാർ. വിദേശ കമ്പനികളുടെ സാങ്കേതിക ആധിപത്യവും സുരക്ഷാ വെല്ലുവിളികളും കൃത്യമായി നിരീക്ഷിച്ചുകൊണ്ട് മാത്രമേ സ്റ്റാർലിങ്കിൻ്റെ വാണിജ്യപരമായ തുടക്കത്തിന് അനുമതി നൽകൂ എന്നാണ് റിപ്പോർട്ടുകൾ സൂചിപ്പിക്കുന്നത്.
