ന്യൂഡൽഹി : യുവതലമുറ തെരുവിൽ നടത്തുന്ന പ്രക്ഷോഭങ്ങൾ ബംഗ്ലാദേശിലും നേപ്പാളിലും ശ്രീലങ്കയിലും ഉണ്ടായതുപോലെ ഭരണകൂടത്തെ അട്ടിമറിക്കാനാണോ ?
ഭരണമാറ്റം നടക്കേണ്ടത് തെരുവുസമരങ്ങളിലൂടെയല്ല, മറിച്ച് തെരഞ്ഞെടുപ്പിലൂടെയാണ്. ഈ യുവജന പ്രക്ഷോഭത്തിൻ്റെ ഭാവി എന്തായിരിക്കുമെന്നത് വലിയൊരു ചോദ്യചിഹ്നമാണ്.
ജനങ്ങളെ തെരുവിൽ അണിനിരത്താൻ കഴിഞ്ഞതുകൊണ്ട് മാത്രം കാര്യമില്ല; ആ പ്രതിഷേധങ്ങളെ ജനാധിപത്യപരമായ മാറ്റങ്ങളാക്കി മാറ്റാൻ ഈ യുവതലമുറയ്ക്ക് സാധിക്കുമോ എന്നതിനെ ആശ്രയിച്ചായിരിക്കും ഈ സമരത്തിന്‍റെ വിജയം.
തെരഞ്ഞെടുപ്പുകളിലെ സുതാര്യത ഉറപ്പാക്കണമെന്നും പൗരാവകാശങ്ങൾ സംരക്ഷിക്കണമെന്നും ആവശ്യപ്പെട്ടാണ് ഡൽഹിയിലും മുംബൈയിലും ഉൾപ്പെടെയുള്ള നഗരങ്ങളിൽ യുവാക്കൾ സമരവുമായി രംഗത്തിറങ്ങിയിരിക്കുന്നത്.
ഈ പ്രക്ഷോഭങ്ങളുടെ മുൻനിരയിലുള്ള ‘കോക്ക്റോച്ച് ജനതാ പാർട്ടി’ (സി.ജെ.പി) എന്ന സംഘടന, ‘ലെഹരാ ദോ തിരംഗ’ (ദേശീയപതാക ഉയർത്തൂ) എന്ന പേരിൽ നടത്തിയ മാർച്ചിലൂടെയാണ് വീണ്ടും ശ്രദ്ധിക്കപ്പെട്ടത്. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കുക, വോട്ടർ പട്ടികയിലെ അപാകതകൾ പരിഹരിക്കുക തുടങ്ങിയവയാണ് പ്രധാന ആവശ്യങ്ങൾ.
ഇതിനിടയിൽ ചിലർ പ്രധാനമന്ത്രിയുടെയും ആഭ്യന്തരമന്ത്രിയുടെയും രാജിയും ആവശ്യപ്പെട്ടിട്ടുണ്ട്. ബി ജെ പിക്ക് വേണ്ടി ഗ്യാനേഷ് കുമാർ, തിരഞ്ഞെടുപ്പുകൾ അട്ടിമറിച്ചു എന്നാണ് അവരുടെ ആരോപണം. എന്നാൽ സർക്കാരിനെ അട്ടിമറിക്കുകയല്ല, തെരഞ്ഞെടുപ്പ് പ്രക്രിയ സുതാര്യമാക്കുകയാണ് തങ്ങളുടെ ലക്ഷ്യമെന്നാണ് സമരക്കാർ പറയുന്നത്.
ഈ സമരത്തോട് ഡൽഹിയിലും മുംബൈയിലും പൊലീസും സർക്കാരും രണ്ടുതരത്തിലാണ് പെരുമാറിയത്. മുംബൈയിൽ റാലി നടത്താൻ അനുമതി നൽകിയപ്പോൾ, ഡൽഹിയിൽ പൊലീസ് കർശന നിയന്ത്രണങ്ങൾ ഏർപ്പെടുത്തുകയും സമരനേതാവ് അഭിജിത് ദിപ്കെയെ കരുതൽ തടങ്കലിൽ വെക്കുകയും ചെയ്തു.
സമാധാനപരമായി ദേശീയപതാകയേന്തി പ്രതിഷേധിക്കാനുള്ള അവകാശം തടയുകയാണെന്നാണ് സമരക്കാരുടെ ആരോപണം. എന്നാൽ ക്രമസമാധാനം പാലിക്കാനാണ് നിയന്ത്രണങ്ങൾ ഏർപ്പെടുത്തിയതെന്നാണ് പൊലീസിന്‍റെ വിശദീകരണം.
ഭരണഘടന നൽകുന്ന മൗലികാവകാശങ്ങളും സർക്കാരിൻ്റെ ക്രമസമാധാന ചുമതലയും തമ്മിലുള്ള തർക്കമായാണ് ഇത് രൂപപ്പെട്ടിരിക്കുന്നത്. ബംഗ്ലാദേശിലും നേപ്പാളിലും ശ്രീലങ്കയിലും ഉണ്ടായതുപോലെ യുവജനങ്ങൾ ഭരണകൂടത്തെ അട്ടിമറിക്കാൻ ശ്രമിക്കുകയാണോ എന്ന സംശയവും ചിലർ ഉയർത്തുന്നുണ്ട്.
എന്നാൽ ഇന്ത്യയുടെ ജനാധിപത്യ സംവിധാനവും രാഷ്ട്രീയ സാഹചര്യങ്ങളും തികച്ചും വ്യത്യസ്തമായതിനാൽ അയൽരാജ്യങ്ങളിലെ സമരങ്ങളുമായി ഇതിനെ താരതമ്യം ചെയ്യാൻ കഴിയില്ലെന്നാണ് വിദഗ്ധർ പറയുന്നത്. അതേസമയം, കോൺഗ്രസ് നയിക്കുന്ന ഇന്ത്യ സഖ്യവും മററു പ്രതിപക്ഷ പാർടികളും ബി ജെ പിക്ക് എതിരെ പുതിയ പോർമുഖം തുറക്കാൻ തന്നെയാണ് ലക്ഷ്യമിടുന്നതെന്ന കാര്യം വ്യക്തം.
