ചെന്നൈ : ഡിഎംകെ നേതാവും തമിഴ്നാട് നിയമസഭയിലെ പ്രതിപക്ഷ നേതാവുമായ ഉദയനിധി സ്റ്റാലിനെ ചെന്നൈയിലെ നീലാങ്കരയിലെ വസതിയിൽ നിന്ന് സംസ്ഥാന പോലീസ് കസ്റ്റഡിയിലെടുത്ത സംഭവം തമിഴ്നാട് രാഷ്ട്രീയത്തിൽ വലിയ ചലനങ്ങളാണ് സൃഷ്ടിച്ചിരിക്കുന്നത്.
കാവേരി നദീജല തർക്കവുമായി ബന്ധപ്പെട്ട് തഞ്ചാവൂരിൽ നടന്ന ഡിഎംകെ പ്രതിഷേധ പരിപാടിക്കിടെ മുഖ്യമന്ത്രി സി. ജോസഫ് വിജയ്ക്കും പ്രശസ്ത ചലച്ചിത്ര നടി തൃഷയ്ക്കും എതിരെ ഉദയനിധി നടത്തിയതായി ആരോപിക്കപ്പെടുന്ന അധിക്ഷേപകരമായ പരാമർശങ്ങളാണ് ഈ നടപടിക്ക് കാരണം. പ്രസംഗത്തിനിടെ സദസ്സിൽ നിന്ന് ഉയർന്ന മുദ്രാവാക്യങ്ങളോട് പ്രതികരിക്കവേ ഉദയനിധി നടത്തിയ ദ്വയാർത്ഥ പ്രയോഗം വ്യക്തിഹത്യയാണെന്നും സ്ത്രീത്വത്തെ അപമാനിക്കുന്നതാണെന്നും ചൂണ്ടിക്കാട്ടി തമിഴക വെട്രി കഴകം (ടിവികെ) പ്രവർത്തകർ നൽകിയ പരാതിയിലാണ് പൊലീസ് കേസ് രജിസ്റ്റർ ചെയ്തത്.
തമിഴ്നാട്ടിലെ പുതിയ രാഷ്ട്രീയ അന്തരീക്ഷത്തിൽ ഈ അറസ്റ്റ് നിർണായക വഴിത്തിരിവാണ്. പരമ്പരാഗത ദ്രാവിഡ കക്ഷികളായ ഡിഎംകെയെയും എഐഎഡിഎംകെയെയും വെല്ലുവിളിച്ച് അധികാരത്തിലെത്തിയ വിജയ്യുടെ ടിവികെ സർക്കാരും, പ്രധാന പ്രതിപക്ഷമായ ഡിഎംകെയും തമ്മിലുള്ള വ്യക്തിപരമായ പോരാട്ടമായി ഇത് മാറിയിരിക്കുന്നു.
രാഷ്ട്രീയ പ്രസംഗങ്ങളിലെ മാന്യതയെക്കുറിച്ചും വ്യക്തിഹത്യയെക്കുറിച്ചുമുള്ള ചർച്ചകൾ വീണ്ടും സജീവമാകുമ്പോൾ, ഭരണകൂടത്തിന്റെ പ്രതികാര നടപടിയാണ് ഇതെന്ന് ഡിഎംകെ ആരോപിക്കുന്നു. നേരെമറിച്ച്, പൊതുവേദിയിൽ സ്ത്രീകളെ വ്യക്തിപരമായി ആക്ഷേപിക്കുന്നത് അഭിപ്രായസ്വാതന്ത്ര്യത്തിന്റെ പരിധിയിൽ വരില്ലെന്ന ഉറച്ച നിലപാടിലാണ് ഭരണപക്ഷവും മറ്റ് ഭരണഘടനാ സ്ഥാപനങ്ങളും.
കഴിഞ്ഞ 30 വർഷത്തെ ദേശീയ രാഷ്ടീയ ചരിത്രം പരിശോധിച്ചാൽ, അധികാരമാറ്റങ്ങൾക്കും രാഷ്ട്രീയ വൈരങ്ങൾക്കും പിന്നാലെ പ്രമുഖ നേതാക്കൾ അറസ്റ്റിലാകുന്നതും ജയിൽവാസം അനുഭവിക്കുന്നതും അപൂർവമായ സംഭവമല്ല.
2001-ൽ തമിഴ്നാട് രാഷ്ട്രീയം കണ്ട ഏറ്റവും വലിയ സംഭവങ്ങളിലൊന്ന് മുൻ മുഖ്യമന്ത്രി എം. കരുണാനിധിയുടെ അർദ്ധരാത്രിയിലെ അറസ്റ്റായിരുന്നു. ഫ്ലൈഓവർ നിർമ്മാണത്തിലെ അഴിമതി ആരോപിച്ചായിരുന്നു ജയലളിത സർക്കാരിന്റെ കാലത്ത് പോലീസ് അദ്ദേഹത്തിന്റെ വസതിയിൽ അതിക്രമിച്ച് കയറി അറസ്റ്റ് ചെയ്തത്.
പിന്നീട് 2014-ൽ അന്നത്തെ മുഖ്യമന്ത്രിയായിരുന്ന ജയലളിത തന്നെ അനധികൃത സ്വത്ത് സമ്പാദന കേസിൽ ശിക്ഷിക്കപ്പെട്ട് ബംഗളൂരു പരപ്പന അഗ്രഹാര ജയിലിൽ കഴിയേണ്ടി വന്നു.
തമിഴ്നാടിന് പുറത്തും സമാനമായ നിരവധി അഴിമതി കേസുകളും രാഷ്ട്രീയ പ്രതികാര നടപടികളും പ്രമുഖ നേതാക്കളുടെ അറസ്റ്റിലേക്ക് നയിച്ചിട്ടുണ്ട്. 2023-ൽ ആന്ധ്രാപ്രദേശ് മുൻ മുഖ്യമന്ത്രിയും ടിഡിപി അധ്യക്ഷനുമായ എൻ. ചന്ദ്രബാബു നായിഡു സ്കിൽ ഡെവലപ്മെന്റ് അഴിമതിക്കേസിൽ പ്രതിചേർക്കപ്പെട്ട് ജയിലിലടയ്ക്കപ്പെട്ടു.
അതിനുമുമ്പ് 2012-ൽ വൈഎസ്ആർ കോൺഗ്രസ് അധ്യക്ഷൻ വൈ.എസ്. ജഗൻ മോഹൻ റെഡ്ഡി അനധികൃത സ്വത്ത് സമ്പാദന കേസിൽ സിബിഐ അറസ്റ്റ് ചെയ്ത് 16 മാസത്തോളം ചഞ്ചൽഗുഡ ജയിലിൽ കഴിഞ്ഞതും രാഷ്ട്രീയം കണ്ടതാണ്.
ഏറ്റവും ഒടുവിൽ, ഡൽഹി മദ്യനയക്കേസുമായി ബന്ധപ്പെട്ട് ഡൽഹി മുഖ്യമന്ത്രിയായിരുന്ന അരവിന്ദ് കെജ്രിവാളും ഉപമുഖ്യമന്ത്രി മനീഷ് സിസോദിയയും ഇ.ഡി അറസ്റ്റ് ചെയ്തതിനെത്തുടർന്ന് ജയിലിലായി.
സമാനമായി ഝാർഖണ്ഡ് മുൻ മുഖ്യമന്ത്രി ഹേമന്ത് സോറനും ഭൂമി കുംഭകോണ കേസിൽ മാസംങ്ങളോളം ജയിൽവാസം അനുഭവിച്ചു. കേന്ദ്ര-സംസ്ഥാന തലങ്ങളിലെ ഏജൻസികളെ രാഷ്ട്രീയ ലാഭങ്ങൾക്കായി ഉപയോഗിക്കുന്നുവെന്ന ആരോപണങ്ങൾ നിരന്തരം ഉയർന്നുവരുന്നതാണ് ഈ സംഭവങ്ങളിലെല്ലാം കാണാൻ സാധിക്കുന്നത്.
തമിഴ്നാട്ടിൽ ഉദയനിധി സ്റ്റാലിന്റെ അറസ്റ്റ് വരും ദിവസങ്ങളിൽ തെരുവ് യുദ്ധങ്ങൾക്കും വലിയ നിയമപോരാട്ടങ്ങൾക്കും വഴിവെക്കുമെന്ന് ഉറപ്പാണ്. ഡിഎംകെ ഈ വിഷയത്തെ വലിയ രാഷ്ട്രീയ ആയുധമാക്കാൻ ശ്രമിക്കുമ്പോൾ, സ്ത്രീകളുടെ മാന്യതയും ഭരണകൂടത്തിന്റെ പ്രതിച്ഛായയും ഉയർത്തിക്കാട്ടി പ്രതിരോധിക്കാനാണ് വിജയ് സർക്കാരിൻ്റെ നീക്കം. രാഷ്ട്രീയ എതിരാളികൾക്കെതിരെ വ്യക്തിപരമായ അധിക്ഷേപങ്ങൾ നടത്തുന്ന സംസ്കാരത്തിന് ഇത് തടയിടുമോ അതോ പ്രതികാര രാഷ്ട്രീയത്തിന്റെ പുതിയൊരു അധ്യായത്തിന് തുടക്കമിടുമോ എന്നത് തമിഴ്നാട് രാഷ്ട്രീയം വരും ദിവസങ്ങളിൽ ഉറ്റുനോക്കുന്ന പ്രധാന കാര്യമാണ്.
