മോസ്കോ : യുക്രൈനുമായുള്ള യുദ്ധവുമായി ബന്ധപ്പെട്ട വർദ്ധിച്ച സൈനിക ചെലവുകൾ കാരണം റഷ്യ സ്വർണം വിൽക്കുന്നു. 2022നും 2025നും ഇടയിൽ സർക്കാർ ഇതിനോടകം 150 ബില്യണിലധികം മൂല്യമുള്ള സ്വർണവും വിദേശ കറൻസി ആസ്തികളും വിറ്റഴിച്ചു.
റഷ്യൻ കേന്ദ്ര ബാങ്ക് ഈ വർഷം ഇതുവരെ ഏകദേശം 700,000 ട്രോയ് ഔൺസ് സ്വർണമാണ് കയ്യൊഴിഞ്ഞത്.കടുത്ത സാമ്പത്തിക വെല്ലുവിളികൾ നേരിടുന്ന റഷ്യ തങ്ങളുടെ സ്വർണ ശേഖരം പരമാവധി പ്രയോജനപ്പെടുത്തുകയാണ്.
ഇതോടെ വർഷാരംഭത്തിൽ 74.8 ദശലക്ഷം ട്രോയ് ഔൺസ് ഉണ്ടായിരുന്ന റഷ്യയുടെ ഔദ്യോഗിക സ്വർണ ശേഖരം ഏപ്രിൽ ആദ്യം 74.1 ദശലക്ഷം ട്രോയ് ഔൺസായി കുറഞ്ഞു.
ഡോളർ കണക്കിൽ കേന്ദ്ര ബാങ്കിന്റെ സ്വർണ ശേഖരം മാർച്ച് അവസാനം 334 ബില്യൺ ആണ്. മുൻ മാസം ഇത് 384 ബില്യണിൽ ഡോളറായിരുന്നു. എങ്കിലും ജനുവരി ഒന്നിന് രേഖപ്പെടുത്തിയ 325 ബില്യണെക്കാൾ കൂടുതലാണ് ഈ മൂല്യം.
ഈ മൂല്യത്തകര്ച്ച കഴിഞ്ഞ മാസം സ്വർണവിലയിൽ ഉണ്ടായ ഇടിവ് കൂടിയാണ് കാണിക്കുന്നത്. 2025 ൽ സ്വർണ വില കുതിച്ചുയരാനുള്ള കാരണങ്ങളിലൊന്ന് വിവിധ രാജ്യങ്ങളുടെ കേന്ദ്രബാങ്കുകൾ സ്വർണം വാങ്ങിക്കൂട്ടിയതാണ്.
ചൈനയിലേയും ബ്രസീലിലേയും കേന്ദ്ര ബാങ്കുകൾ ഈ വർഷവും സ്വർണം വാങ്ങിക്കൂട്ടിയപ്പോൾ റഷ്യ ഈ വർഷം സ്വർണം വിൽക്കുന്നതിലാണ് ശ്രദ്ധകേന്ദ്രീകരിച്ചത്. റഷ്യൻ ബാങ്ക് 2025 നവംബറിലാണ് തദ്ദേശീയ വിപണിയിൽ സ്വർണം വിൽക്കാൻ തുടങ്ങിയത്.
രാജ്യത്തിൻ്റെ സാമ്പത്തിക കരുതൽ ധനമായ നാഷണൽ വെൽത്ത് ഫണ്ടിനു വേണ്ടിയുള്ള പ്രവർത്തനങ്ങളുടെ ഭാഗമായിരുന്നു ഇത്. സ്വർണവില വർദ്ധിച്ചത് കരുതൽ ധനത്തിൽ സ്വർണത്തിൻ്റെ പങ്ക് കൂട്ടിയെന്നും അതിനാൽ വൈവിധ്യവൽക്കരണം ആവശ്യമാണെന്നും ബാങ്ക് അന്ന് വിശദീകരിച്ചു.
തുടക്കത്തിൽ മിതമായ തോതിലായിരുന്നു വിൽപന. എന്നാൽ കഴിഞ്ഞ രണ്ട് പതിറ്റാണ്ടിനിടെ റഷ്യയുടെ ഔദ്യോഗിക സ്വർണ ശേഖരത്തിൽ നടന്ന ഏറ്റവും വലിയ വിൽപനയിലാണ് രാജ്യം എത്തി നിൽക്കുന്നത്. കേന്ദ്ര ബാങ്ക് ജനുവരിയിൽ ഏകദേശം 300,000 ഔൺസും ഫെബ്രുവരിയിൽ 200,000 ഔൺസും വിറ്റഴിച്ചു. ഇത് 2002-ൻ്റെ രണ്ടാം പാദത്തിനു ശേഷമുള്ള ഏറ്റവും വലിയ രണ്ട് മാസത്തെ വിൽപ്പനയാണ്.
ധനകാര്യ മന്ത്രാലയവും കേന്ദ്ര ബാങ്കും തമ്മിലുള്ള ആഭ്യന്തര കൈമാറ്റങ്ങൾക്ക് പകരം കേന്ദ്ര ബാങ്കിന്റെ ശേഖരത്തിൽ നിന്ന് നേരിട്ട് സ്വർണക്കട്ടികൾ തുറന്ന വിപണിയിലേക്ക് വിൽക്കുന്നത് 25 വർഷത്തിനിടെ ആദ്യമായാണ്. റഷ്യയുടെ വർദ്ധിച്ചുവരുന്ന ബജറ്റ് കമ്മിയാണ് ഈ വിൽപ്പനയിലേക്ക് നയിക്കുന്നത്.
എണ്ണ കയറ്റുമതി വരുമാനം സമ്മർദ്ദത്തിലായിരിക്കുകയും പാശ്ചാത്യ ഉപരോധങ്ങൾ റഷ്യയുടെ പല വിദേശ കരുതൽ ധനത്തിലേക്കുള്ള പ്രവേശനം തടയുകയും ചെയ്യുന്ന സാഹചര്യത്തിൽ സ്വർണ്ണവും ചൈനീസ് യുവാനും മാത്രമാണ് റഷ്യക്ക് പണമാക്കി മാറ്റാൻ സാധിക്കുന്ന ആസ്തികൾ.
2022-ൽ യുക്രൈൻ അധിനിവേശത്തിന് ശേഷം പാശ്ചാത്യ രാജ്യങ്ങൾ ഏർപ്പെടുത്തിയ ഉപരോധങ്ങൾ കാരണം, റഷ്യൻ കേന്ദ്ര ബാങ്കിന് യു.എസ്. ഡോളറോ യൂറോയോ സ്വതന്ത്രമായി വാങ്ങാനോ വിൽക്കാനോ കഴിയുന്നില്ല. അതിനാൽ, സ്വർണവും യുവാനുമാണ് അവരുടെ കരുതൽ ശേഖരം കൈകാര്യം ചെയ്യാനുള്ള തന്ത്രത്തിൻ്റെ പ്രധാന ഘടകങ്ങൾ.
