തിരുവനന്തപുരം: രാഹുല് മാങ്കൂട്ടത്തിലിനെതിരായ ബലാത്സംഗ പരാതിയില് പരാതിക്കാരിയുടെ കൂടുതല് വിവരങ്ങള് പുറത്തുരുമ്പോള് കുരുക്ക് മുറുകുകയാണ്. രാഹുലിനെ പരിചയപ്പെട്ടത് ആദ്യ വിവാഹം ഒഴിഞ്ഞ ശേഷമാണെന്നും, വിവാഹബന്ധം നീണ്ടു നിന്നത് ഒരു മാസം മാത്രമാണെന്നും യുവതി അന്വേഷണ സംഘത്തിന് മൊഴി നല്കി. ആദ്യ വിവാഹം നടന്നത് 2024 ഓഗസ്ത് 22ന് ക്ഷേത്രത്തില് വെച്ചാണ്. വിവാഹം നിയമപരമായി രജിസ്റ്റര് ചെയ്തിട്ടില്ല. വെറും നാല് ദിവസം മാത്രമാണ് ഒരുമിച്ച് താമസിച്ചത്. ഒരു മാസത്തിനുള്ളില് ബന്ധം ഒഴിഞ്ഞുവെന്നും യുവതി അന്വേഷണസംഘത്തിന് കഴിഞ്ഞദിവസം കൊടുത്ത മൊഴിയില് പറയുന്നു. രാഹുലിന്റെ ജാമ്യ ഹര്ജ്ജിയിലെ വാദങ്ങളെ പൊളിക്കുന്നതാണ് യുവതിയുടെ മൊഴി.
വിവാഹബന്ധം ഒഴിഞ്ഞ് 5 മാസത്തിന് ശേഷമാണ് രാഹുലിനെ പരിചയപ്പെടുന്നതെന്നാണ് യുവതിയുടെ മൊഴിയില് പറയുന്നത്. വിവാഹിതക്ക് എങ്ങിനെ വിവാഹ വാഗ്ദാനം നല്കും എന്ന രാഹുലിന്റെ വാദത്തിന് എതിരെ ആണ് ഈ മൊഴി. ഭര്ത്താവിരിക്കെയാണ് യുവതി രാഹുലുമായി ബന്ധപ്പെട്ടത് എന്ന ആരോപണം ഉയര്ന്നിരുന്നു. ഈ വാദത്തെ പൊളിക്കുന്നതാണ് യുവതിയുടെ മൊഴിയിലെ വിവരങ്ങള്. അതേസമയം, യുവതി വിവാഹിതയാണെന്ന കാര്യം തനിക്ക് അറിയാമായിരുന്നുവെന്ന് രാഹുല് മുന്കൂര് ജാമ്യാപേക്ഷയില് പറഞ്ഞിട്ടുമുണ്ട്. ഭര്ത്താവിന്റെ ഉപദ്രവങ്ങള് വിവരിച്ചാണ് തന്നോട് സംസാരിച്ചതെന്നും, ആ ബന്ധമാണ് വളര്ന്നതും പിന്നീട് ലൈംഗികബന്ധത്തില് എത്തിയത് എന്നും രാഹുല് മുന്കൂര് ജാമ്യാപേക്ഷയില് വ്യക്തമാക്കിയിട്ടുണ്ട്. കേസില് അന്വേഷണ സംഘം ഇന്ന് യുവതിയെ പരിശോധിച്ച ഡോക്ടറുടെ മൊഴിയെടുക്കും. ഡോക്ടറുടെ മൊഴി കേസില് നിര്ണ്ണായകമാകും.
