ചെന്നൈ: ജോസഫ് വിജയ് അധികാരമേററതിന് പിന്നാലെ എഐഎഡിഎംകെ പിളർപ്പിലേക്ക് നീങ്ങുന്നു. സർക്കാരിനെ പിന്തുണയ്ക്കണമെന്നാണ് ഒരു വിഭാഗത്തിൻ്റെ വാദം.
47 എംഎൽഎമാരാണ് എഐഎഡിഎംകെയ്ക്കുള്ളത്. സത്യപ്രതിജ്ഞയ്ക്കായി ഇവർ നിയമസഭയിൽ എത്തിയത് രണ്ട് സംഘങ്ങളായിട്ടാണ്. 11 പേരടങ്ങുന്ന ഒരു സംഘം എടപ്പാടി പളനിസ്വാമിക്കൊപ്പവും 36 പേരടങ്ങുന്ന മറ്റൊരു സംഘം മുതിർന്ന നേതാവ് സി.വി. ഷൺമുഖനും എസ്.പി. വേലുമണിക്കുമൊപ്പമാണ് എത്തിയത്.
പാർട്ടി ജനറൽ സെക്രട്ടറി എടപ്പാടി പളനി സ്വാമി ജില്ലാ സെക്രട്ടറിമാരുടെ യോഗം വിളിച്ച സമയത്ത് വിമത നേതാക്കൾ എംഎൽഎമാരുടെ യോഗം വിളിച്ചു.എടപ്പാടി പളനി സ്വാമി രാജിവെക്കണമെന്ന് ഒരു കൂട്ടം എംഎൽഎമാർ ആവശ്യപ്പെട്ടു.കടുത്ത സമ്മർദ്ദം ഉയർന്നിട്ടും അദ്ദേഹം രാജിവെക്കാൻ തയ്യാറായിട്ടില്ല.
പളനി സ്വാമിക്കു കീഴിൽ നിയമസഭയിലേക്കും ലോക്സഭയിലേക്കുമുള്ള നാല് തിരഞ്ഞെടുപ്പുകളിൽ പാർട്ടി തുടർച്ചയായി കനത്ത തോൽവി ഏറ്റുവാങ്ങിയതിൽ പാർടിയിൽ അസ്വസ്ഥതയുണ്ടാക്കിയിട്ടുണ്ട്. നേതൃപദവിയിൽനിന്ന് ഒഴിയാൻ എടപ്പാടി പളനി സ്വാമിയോട് ഷൺമുഖം ആവശ്യപ്പെട്ടുവെന്നും എന്നാൽ അദ്ദേഹം ഇതംഗീകരിച്ചില്ലെന്നും പറയുന്നു.
വിശ്വാസ വോട്ടെടുപ്പിൽ ഷൺമുഖവും എസ്.പി. വേലുമണിയും അടങ്ങുന്ന എംഎൽഎമാരുടെ വിമത സഖ്യം ടിവികെയെ പിന്തുണക്കാൻ തീരുമാനിച്ചിരുന്നുവെന്നുള്ള അഭ്യൂഹങ്ങൾ നേരത്തെ ഉണ്ടായിരുന്നു.
