കൊച്ചി : മലയാള സിനിമയിലെ നടീനടന്മാരുടെ സംഘടനയായ ‘അമ്മ’യെ ഇനി വനിതകള് നയിക്കും. ശ്വേതാ മേനോനാണ് പ്രസിഡന്റ്. കുക്കു പരമേശ്വരൻ ജനറല് സെക്രട്ടറിയും. ഉണ്ണി ശിവപാൽ ആണ് ട്രഷറർ.
ശ്വേത മേനോനെതിരെ ദേവനാണ് മത്സരിച്ചിരുന്നത്. കുക്കു പരമേശ്വരന് എതിരെ രവീന്ദ്രനും. വൈസ് പ്രസിഡന്റ് സ്ഥാനത്തേക്ക് ജയൻ ചേർത്തല, നാസർ ലത്തീഫ്, ലക്ഷ്മി പ്രിയ എന്നിവരാണ് മത്സരിച്ചിരുന്നത്. ഉണ്ണി ശിവപാലിനിതിരെ അനൂപ് ചന്ദ്രൻ ട്രഷറര് സ്ഥാനത്തേക്കും മത്സരിച്ചു.
ജോയിൻ സെക്രട്ടറി സ്ഥാനത്തേക്ക് അൻസിബ ഹസൻ എതിരില്ലാതെ തെരഞ്ഞെടുക്കപ്പെട്ടിരുന്നു. ഈ സ്ഥാനത്തേക്ക് നേരത്തെ 13 പേർ പത്രിക സമർപ്പിച്ചിരുന്നു. എന്നാല് അന്സിബ ഒഴികെ മറ്റ് 12 പേരും പത്രിക പിന്വലിക്കുകയായിരുന്നു.
ആകെ 504 അംഗങ്ങളാണ് അസോസിയേഷനിലുള്ളത്. 70 ശതമാനം ആയിരുന്നു കഴിഞ്ഞ തവണത്തെ പോളിംഗ്. ഇക്കുറി കടുത്ത മത്സരം നടന്നിട്ടും 12 ശതമാനം ഇടിവോടെ 298 പേരാണ് വോട്ട് ചെയ്തത്.58 ശതമാനമാണ് പോളിംഗ്.
