വാഷിങ്ടണ്: റഷ്യയില്നിന്ന് ക്രൂഡോയില് വാങ്ങുന്നത് തടയാന് ഇന്ത്യ, ചൈന എന്നീ രാജ്യങ്ങളില് നിന്നുമുള്ള ഉത്പന്നങ്ങള്ക്ക് 500 ശതമാനം നികുതി ചുമത്താൻ അമേരിക്ക ഒരുങ്ങുന്നു.
സെനറ്റില് ഇതിനുള്ള ബില്ല് കൊണ്ടുവരുമെന്നാണ് സൂചന. ചൈനയുമായി വ്യാപാരക്കരാര് ഒപ്പിടുകയും ഇന്ത്യയുമായുള്ള കരാര് ചര്ച്ചകള് പുരോഗമിക്കുകയും ചെയ്യുന്നതിനിടെയാണ് പുതിയ ബില്ല് വരുന്നത്.
ബില്ലിന് പ്രസിഡന്റ് ഡൊണാള്ഡ് ട്രംപിന്റെ പിന്തുണയുമുണ്ടെന്നാണ് പറയുന്നത്. റിപ്പബ്ലിക്കൻ സെനറ്റര് ലിന്ഡ്സെ ഗ്രഹാം, ഡെമോക്രാറ്റ് സെനറ്റര് റിച്ചാര്ഡ് ബ്രുമെന്തല് എന്നിവര് ചേര്ന്നാണ് ബില്ല് അവതരിപ്പിക്കുന്നത്.
യുക്രൈന് യുദ്ധത്തില്നിന്ന് റഷ്യയെ പിന്തിരിപ്പിക്കാന് അവരെ സാമ്പത്തികമായി ഒറ്റപ്പെടുത്തുക എന്നതാണത്രെ ലക്ഷ്യം.ഓഗസ്റ്റിലായിരിക്കും ബിൽ അവതരണം.
ഇന്ത്യയും ചൈനയുമാണ് റഷ്യയിൽ നിന്നുള്ള എണ്ണയുടെ 70 ശതമാനവും വാങ്ങുന്നത്. അങ്ങനെയുള്ളവര് അമേരിക്കയിൽ അവരുടെ ഉത്പന്നങ്ങള് വില്ക്കണമെങ്കില് ഉയര്ന്ന നികുതി നല്കുക തന്നെ വേണമെന്ന് സെനറ്റര് ലിന്ഡ്സെ ഗ്രഹാം പറയുന്നു.
റഷ്യയില്നിന്ന് ക്രൂഡോയില് വാങ്ങുന്നതിലൂടെ യുക്രൈനെതിരായ യുദ്ധത്തന് ഇന്ത്യയും ചൈനയും റഷ്യയെ സഹായിക്കുകയാണെന്നും അദ്ദേഹം ആരോപിച്ചു.
ബില് നിയമം ആയാല് ഇന്ത്യയുടെ ഫാര്മ, ടെക്സ്റ്റൈല്, ഐടി മേഖലകളെ സാരമായി ബാധിക്കും.റഷ്യയില്നിന്ന് കുറഞ്ഞ വിലയ്ക്ക് ക്രൂഡോയില് വാങ്ങുന്നതില് മുമ്പന്തിയില് നില്ക്കുന്ന രാജ്യമാണ് ഇന്ത്യ.2022-ല് യുക്രൈനിലേക്ക് റഷ്യ അധിനിവേശം നടത്തിയതിന് ശേഷം റഷ്യയില്നിന്ന് ക്രൂഡോയില് വാങ്ങുന്നത് ഇന്ത്യ കുത്തനെ വര്ധിപ്പിച്ചിരുന്നു.
