ന്യൂഡൽഹി : എം പിമാർ മത്സരിക്കേണ്ടെന്ന കോൺഗ്രസ് ദേശീയ നേതൃത്വത്തിൻ്റെ തീരുമാനം മാററി. പ്രവർത്തക സമിതി അംഗം കെ സുധാകരന് കണ്ണൂരിൽ സ്ഥാനാർഥിയാവാൻ പാർടി നേതൃത്വം അനുമതി നൽകി.
എ കെ ആൻ്റണിയും മുൻ കെ പി സി സി പ്രസിഡണ്ട് രമേശ് ചെന്നിത്തലയും ഇടപെട്ടതാണ് നിർണായകമായത്. ആൻ്റണി കോൺഗ്രസ് അധ്യക്ഷൻ മല്ലികാർജുന ഖാർഗെയോടും രാഹുൽ ഗാന്ധിയോടും സംസാരിച്ചു.
സുധാകരനും അടൂർ പ്രകാശുമായിരുന്നു മത്സരിക്കണമെന്ന പിടിവാശിയിൽ നിൽപ്പുറപ്പിച്ചത്. സുധാകരൻ കണ്ണൂരിൽ സ്വതന്ത്രമായി മൽസരിക്കുമെന്ന ഭീഷണി ഉയർത്തിയതിനെ തുടർന്നായിരുന്നു പാർടി കീഴടങ്ങിയത്. വേറെ പാർടി രൂപവൽക്കരിച്ച് 20 മണ്ഡലങ്ങളിൽ മൽസരിക്കുമെന്ന സൂചനകളും പുറത്തുവന്നു.
വലിയ പൊട്ടിത്തെറി സുധാകരനിൽ നിന്നുണ്ടാവുമോ എന്ന ആശങ്കയിലായിരുന്നു കോൺഗ്രസും. അർധരാത്രിവരെ സീറ്റുനിർണയ ചർച്ചകളുടെ വാർത്തകൾ നിരീക്ഷിച്ചിരുന്ന സുധാകരൻ സീറ്റില്ലെങ്കിലും മത്സരിക്കും എന്ന നിലപാടിൽ ഉറച്ചു നിൽക്കുകയായിരുന്നു.
കെ പി സി സി പ്രസിഡണ്ട് സണ്ണി ജോസഫ്, പ്രവർത്തക സമിതി അഗം രമേശ് ചെന്നിത്തല എന്നിവരെ സുധാകരൻ വിളിച്ച് ‘ഗുഡ് ബൈ’ പറഞ്ഞുവെന്ന വിവരം പുറത്തുവന്നിരുന്നു.
