ചെന്നൈ:‘മാങ്കുയിലേ പൂങ്കുയിലേ’ എന്ന ഗാനം ഓർമയുണ്ടോ ? വിയററ് നാം കോളനിയിലെ നായിക കനകയെ ഓർമ്മ വരുന്നുണ്ടോ ?
തമിഴിൽ ഗംഗൈ അമരൻ സംവിധാനം ചെയ്ത‘കരകാട്ടക്കാരൻ’ ചിത്രത്തിലെ കനക–രാമരാജൻ ജോഡി തമിഴ് പ്രേക്ഷകർക്ക് പ്രിയങ്കരമാണ്. ആ ചിത്രത്തിലേതാണ് ‘മാങ്കുയിലേ പൂങ്കുയിലേ’ എന്ന ഗാനം. ഒരു വർഷത്തോളം തിയറ്ററുകളിൽ നിറഞ്ഞോടിയ ചിത്രമായിരുന്നു ‘കരകാട്ടക്കാരൻ’.
1989ൽ പുറത്തിറങ്ങിയ ‘കരകാട്ടക്കാരൻ’ എന്ന തന്റെ ആദ്യചിത്രത്തിൽ നായകനായ രാമരാജനെ കനക സന്ദർശിച്ചത് വാർത്തയായി.യുവസംഗീത സംവിധായകൻ ധരൻ കുമാറിനൊപ്പമാണ് കനക പഴയനായകൻ രാമരാജനെ കാണാനെത്തിയത്.
ഒരുമിച്ച് ഉച്ചഭക്ഷണം കഴിക്കുകയും ഒരുപാട് പഴയകാല സിനിമാ വിശേഷങ്ങൾ പങ്കുവയ്ക്കുകയും ചെയ്തുവെന്ന് ധരൻ കുമാർ ഫേസ്ബുക്കിൽ കുറിച്ചു. ‘ഉച്ചഭക്ഷണം ഒരു ഓർമ്മ പുതുക്കലായി മാറുമ്പോൾ !! എന്റെ സഹോദരി കനകയോടും രാമരാജൻ സാറിനോടുമൊപ്പം 37 വർഷത്തെ സിനിമാ ഓർമകൾ അയവിറക്കുന്നു,’ എന്നായിരുന്നു ധരൻ കുമാറിന്റെ വാക്കുകൾ.
കനകയുടെ പുതിയ ചിത്രങ്ങൾ ആരാധകർ ഏറ്റെടുത്തു. കനകയുടെ രൂപത്തിൽ വന്ന മാറ്റമാണ് അതിനൊപ്പം വലിയ ചർച്ചയായത്. സിൽവർ നിറത്തിൽ ഹൈലൈറ്റ് ചെയ്യുന്ന ഐ മേക്കപ്പിലാണ് കനക ചിത്രങ്ങളിൽ പ്രത്യക്ഷപ്പെട്ടത്. കനകയുടെ ഈ ലുക്കും ഏറെ ചർച്ചയായി. സമൂഹമാധ്യമങ്ങളിൽ സജീവമല്ലാത്ത താരമാണ് കനക.നിരവധി ഗോസിപ്പുകളും താരത്തിന്റെ അജ്ഞാതമായ വ്യക്തിജീവിതത്തെപ്പറ്റി സജീവം.
