തിരുവനന്തപുരം :മുൻ മുഖ്യമന്ത്രി പിണറായി വിജയൻ്റെ തിരുവനന്തപുരത്തെ വീടിനു മുന്നിൽ ഇ ഡി ഉദ്യോഗസ്ഥര്ക്ക് നേരെയുണ്ടായ ആക്രമണം സംബന്ധിച്ച കേസിൽ മുതിർന്ന സി പി എം നേതാക്കളെയും പ്രതികളാക്കാൻ നീക്കം.
താഴെ തട്ടിലെ സിപിഎം പ്രവര്ത്തകര് മാത്രമാണ് പ്രതികൾ. എന്നാല് സംസ്ഥാന സെക്രട്ടറി എം വി ഗോവിന്ദൻ ഉള്പ്പെടെയുള്ള നേതാക്കളും എംപിമാരും എംഎല്എമാരും സ്ഥലത്ത് ഉണ്ടായിരുന്നു. അക്രമത്തിലേക്ക് നയിച്ച സാഹചര്യങ്ങളില് ഇവര്ക്കും പങ്കുണ്ടെന്നുമുള്ള വാദമാണ് ഇ ഡി ഉന്നയിക്കുന്നത്.
അറസ്റ്റിലായ പ്രതികളുടെ ജാമ്യാപേക്ഷ സെഷന്സ് കോടതിയില് വരുമ്പോള് കക്ഷി ചേരാനാണ് ഇ ഡി ആലോചന. ഇതിന് മുന്നോടിയായി അക്രമവുമായി ബന്ധപ്പെട്ട ദൃശ്യങ്ങള് ശേഖരിക്കുന്നതടക്കമുള്ള നടപടികള് ഇഡി തുടങ്ങിയിട്ടുണ്ട്.
ഇതിനിടെ മാസപ്പടി കേസില് പിണറായി വിജയന്റെ മകള് വീണയ്ക്ക് വെള്ളിയാഴ്ച വരെ നോട്ടീസ് അയക്കില്ലെന്ന് ഇ ഡി തീരുമാനിച്ചു.
തുടര്നടപടികള് ഹൈക്കോടതി ഡിവിഷന് ബെഞ്ചിന്റെ അന്തിമ വിധി വന്ന ശേഷമേ ഉണ്ടാവൂ.
വീണയ്ക്ക് സമന്സ് അയക്കാനും വിളിച്ചു വരുത്തി ചോദ്യം ചെയ്യാനും നിലവില് നിയമതടസമില്ല. എങ്കിലും തിടുക്കം വേണ്ടെന്ന ധാരണയിലേക്കാണ് എന്ഫോഴ്സ്മെന്റ് ഡയറക്ടറേറ്റ് എത്തിയിരിക്കുന്നത്.
ഇഡി അന്വേഷണം സ്റ്റേ ചെയ്യണമെന്നാവശ്യപ്പെട്ട് സിഎംആര്എല് കമ്പനി നല്കിയ ഹര്ജിയില് വെള്ളിയാഴ്ചയാണ് ഡിവിഷന് ബെഞ്ചിന്റെ ഉത്തരവ് വരിക. അന്തിമ ഉത്തരവ് അനുകൂലമെങ്കില് വേഗത്തില് തുടര് നീക്കങ്ങളുണ്ടാകും.
അന്വേഷണം ഒരു വഴിക്ക് മുന്നോട്ട് കൊണ്ടുപോകുമ്പോള് തന്നെയാണ് തിരുവനന്തപുരത്ത് ഉദ്യോഗസ്ഥര്ക്ക് നേരെയുണ്ടായ ആക്രമണവുമായി ബന്ധപ്പെട്ട കേസ് കടുപ്പിക്കാനുമുള്ള ഇഡി നീക്കം.
