മുംബൈ: തൻ്റെ നാല്പത്തിനാലാം വയസ്സിലും ആരോഗ്യകരമായ ഭക്ഷണക്രമവും ചർമ്മസംരക്ഷണ ശീലങ്ങളും കൊണ്ട് ചർമ്മസൗന്ദര്യം പരിപാലിക്കുന്ന നടി സണ്ണി ലിയോണി മാംസ ഭക്ഷണം കഴിക്കാറില്ലെന്ന് വെളിപ്പെടുത്തുന്നു.
കാരണം മാംസ ഉൽപ്പന്നങ്ങളിലടങ്ങിയ ഹോർമോണുകളുടെയും പ്രിസർവേറ്റീവുകളുടെയും അളവ് തനിക്ക് നല്ലതല്ലെന്ന് അവർ പറയുന്നു.
‘വൃത്തിയുള്ളതും ആരോഗ്യകരവുമായ ഭക്ഷണം കഴിക്കാൻ പരമാവധി ശ്രമിക്കുന്നു. ശരീരത്തിനുള്ളിലേക്ക് കൊണ്ടുവരുന്ന എന്തും തീർച്ചയായും പുറമേ പ്രതിഫലിക്കും. നല്ല ഭക്ഷണം കഴിക്കുന്നതും വ്യായാമം ചെയ്യുന്നതും നല്ല അനുഭവം നൽകും.’-സണ്ണി ലിയോണി കൂട്ടിച്ചേർത്തു.
ശരീരത്തെക്കുറിച്ചുള്ള ആത്മവിശ്വാസം നേടിയെടുക്കുക എളുപ്പമല്ലെന്ന് സമ്മതിക്കുന്ന ചുരുക്കം ചിലരിൽ ഒരാളാണ് സണ്ണി. ഒരുകാലത്ത് മറച്ചുവെക്കാൻ ശ്രമിച്ചതും പിന്നീട് സ്വയം സ്നേഹിക്കാൻ പഠിച്ചതുമായ അപകർഷതാബോധങ്ങളെക്കുറിച്ച് അടുത്തിടെ ഒരു അഭിമുഖത്തിൽ അവർ തുറന്നുപറഞ്ഞു.
‘ചെറുപ്പത്തിൽ ഞാൻ എൻ്റെ കാലുകളെ വെറുത്തിരുന്നു. ഭൂരിഭാഗവും വെള്ളക്കാർ പഠിക്കുന്ന സ്കൂളിൽ പോയിരുന്ന ഞാൻ, എൻ്റെ കാലുകൾ കാണിക്കുന്നത് വെറുത്തിരുന്നു. ഇരുനിറമുള്ള ഒരു ഇന്ത്യൻ പെൺകുട്ടിയായിരുന്നത് കൊണ്ടാണതെന്ന് ഞാൻ കരുതുന്നു. എനിക്ക് ഇരുണ്ട, കട്ടിയുള്ള പഞ്ചാബി മുടിയായിരുന്നു.’കാലവും അനുഭവവും തൻ്റെ കാഴ്ചപ്പാടിനെ മാറ്റിയെന്നും പ്രായമായപ്പോൾ അത് അത്ര മോശമല്ലെന്ന് താൻ തിരിച്ചറിഞ്ഞുവെന്നും താരം കൂട്ടിച്ചേർത്തു.
‘പ്രായത്തെ ചെറുക്കുന്ന കാര്യത്തിൽ, മിക്ക ആളുകളും എപ്പോഴും കാലവുമായി മത്സരിക്കാനാണ് ശ്രമിക്കുന്നത്. പ്രായമാകുമ്പോൾ നിങ്ങൾ കണ്ണാടിയിൽ നോക്കുമ്പോൾ, കാണുന്ന രൂപം നിങ്ങൾക്ക് ഇഷ്ടപ്പെടുന്നുണ്ടോ എന്നതാണ് കാര്യം.
നിങ്ങൾക്ക് എന്തെങ്കിലും മാറ്റണമെന്നുണ്ടെങ്കിൽ, അത് മാറ്റണമെന്നാണ് ഞാൻ കരുതുന്നത്. നിങ്ങൾക്ക് സന്തോഷം നൽകുന്ന എന്തെങ്കിലും ആണെങ്കിൽ – അത് കുത്തിവയ്പ്പുകളോ, ഫില്ലറുകളോ, ലേസറുകളോ, മുറിക്കുന്നതോ, തുന്നിച്ചേർക്കുന്നതോ ആകട്ടെ, നിങ്ങൾക്ക് സന്തോഷം നൽകുന്നതെന്താണോ അത് തീർച്ചയായും ചെയ്യണം.’
ശരിയായ ഡോക്ടറുടെ അടുത്ത് നിന്ന് ചികിത്സ തേടിയില്ലെങ്കിൽ പരിണിതഫലം ഭയാനകമാകുമെന്നും അത് ശരിയാക്കാൻ ഒരുപാട് സമയമെടുക്കുമെന്ന് അനുഭവത്തിൽ നിന്ന് പഠിച്ചിട്ടുണ്ടെന്നും സണ്ണി പറയുന്നു.
