വാഷിങ്ടന്: ഇറാൻ്റെ പരമോന്നത നേതാവ് ആയത്തുല്ല അലി ഖമേനി (86) യെ അമേരിക്കയും ഇസ്രായേലും ചേർന്ന് കൊന്നു. ഇക്കാര്യം ഇറാന് സ്ഥിരീകരിച്ചു.
ഖമേനി കൊല്ലപ്പെട്ടന്ന് നേരത്തെ അമേരിക്കൻ പ്രസിഡന്റ് ഡോണള്ഡ് ട്രംപും ഇസ്രയേല് പ്രധാനമന്ത്രി നെതാന്യൂഹുവും അവകാശപ്പെട്ടിരുന്നു. ഇതിന് പിന്നാലെയാണ് ഇറാൻ്റെ സ്ഥിരികരണം. ഖമേനിയുടെ മകള്, മരുമകന്, ചെറുമകന് എന്നിവരും ആക്രമണത്തില് കൊല്ലപ്പെട്ടതായി റിപ്പോര്ട്ടുകളുണ്ട്.
അമേരിക്ക – ഇസ്രായേല് ഇൻ്റെലിജന്സിനെ മറികടക്കാന് ഖമേനയിക്ക് കഴിഞ്ഞില്ലെന്ന് ട്രംപ് പറഞ്ഞു. ഖമേനിയെ കൂടാതെ ഇറാനിലെ സുപ്രധാന നേതാക്കളെയും വധിച്ചെന്നായിരുന്നു ട്രംപിനെ അവകാശവാദം. സമൂഹമാധ്യമമായ ട്രൂത്ത് സോഷ്യലിലാണ് ഖമേനയി കൊല്ലപ്പെട്ടെന്ന് ട്രംപ് കുറിച്ചത്.
ട്രംപ് ഇങ്ങനെ തുടരുന്നു:
‘ചരിത്രത്തിലെ ഏറ്റവും ക്രൂരരായ വ്യക്തികളില് ഒരാളായ ഖമേനി കൊല്ലപ്പെട്ടു. ഇത് ഇറാനിലെ ജനങ്ങള്ക്ക് മാത്രമല്ല, ഖമേനിയും രക്തദാഹികളായ ഗുണ്ടാസംഘവും കൊലപ്പെടുത്തുകയോ അംഗഭംഗം വരുത്തുകയോ ചെയ്ത എല്ലാ മഹത്തായ അമേരിക്കന് ജനതയ്ക്കും ലോകമെമ്പാടുമുള്ള മറ്റു രാജ്യങ്ങളിലെ ജനങ്ങള്ക്കും ലഭിച്ച നീതിയാണ്.
ഞങ്ങളുടെ ഇൻ്റെലിജന്സിനെയും അത്യന്താധുനിക ട്രാക്കിങ് സംവിധാനങ്ങളെയും മറികടക്കാന് ഖമേനിക്ക് കഴിഞ്ഞില്ല. ഇസ്രയേലുമായി ചേര്ന്ന് പ്രവര്ത്തിച്ചതിനാല് ഖമേനിക്കും ഒപ്പമുള്ളവര്ക്കും ഒന്നും ചെയ്യാന് കഴിഞ്ഞതുമില്ല.
ഇറാനിലെ ജനങ്ങള്ക്ക് അവരുടെ രാജ്യം തിരിച്ചുപിടിക്കാനുള്ള ഏറ്റവും വലിയ അവസരമാണിത്. അവരുടെ റവല്യൂഷണറി ഗാര്ഡ്, സൈന്യം, മറ്റ് സുരക്ഷാ-പൊലീസ് സേനകളിലെ പലരും ഇനി പോരാടാന് ആഗ്രഹിക്കുന്നില്ലെന്നും ഞങ്ങളില് നിന്ന് കുറ്റവിമുക്തി തേടുകയാണെന്നും ഞങ്ങള് അറിയുന്നു.
ഇന്നലെ പറഞ്ഞതുപോലെ, ”ഇപ്പോള് അവര്ക്ക് കുറ്റവിമുക്തി നേടാം, പിന്നീട് അവര്ക്ക് ലഭിക്കുന്നത് മരണം മാത്രമായിരിക്കും.” റവല്യൂഷണറി ഗാര്ഡും പൊലീസും ഇറാനിലെ രാജ്യസ്നേഹികളുമായി സമാധാനപരമായി ഒന്നിക്കുകയും, രാജ്യം അര്ഹിക്കുന്ന മഹത്വത്തിലേക്ക് തിരികെ കൊണ്ടുവരാന് ഒരുമിച്ച് പ്രവര്ത്തിക്കുകയും ചെയ്യുമെന്ന് പ്രതീക്ഷിക്കുന്നു.
എങ്കിലും, പശ്ചിമേഷ്യയിലും ലോകമെമ്പാടും സമാധാനം എന്ന നമ്മുടെ ലക്ഷ്യം കൈവരിക്കുന്നതുവരെ, ശക്തവും കൃത്യവുമായ ബോംബാക്രമണം ഈ ആഴ്ചയിലുടനീളം അല്ലെങ്കില് ആവശ്യമുള്ളത്ര കാലം തടസ്സമില്ലാതെ തുടരും”.
ഖമേനിയുടെ ഔദ്യോഗിക വസതിയും ഓഫീസും ഉള്പ്പെടുന്ന സമുച്ചയം – ആക്രമണത്തിന് ശേഷം.
ശനിയാഴ്ച പുലര്ച്ചെ നടന്ന ആക്രമണത്തില് ഖമേനിയുടെ ഔദ്യോഗിക വസതിയും ഓഫീസും ഉള്പ്പെടുന്ന സമുച്ചയത്തിന് നേരെ 30 ബോംബുകള് പ്രയോഗിച്ചതായാണ് റിപ്പോര്ട്ടുകള്.
സമുച്ചയത്തിന് കാര്യമായ നാശനഷ്ടങ്ങള് സംഭവിച്ചതിന്റെ സാറ്റലൈറ്റ് ചിത്രങ്ങള് പുറത്തുവന്നിട്ടുണ്ട്. ഖമേനി ഒരു ഭൂഗര്ഭ ബങ്കറിലായിരുന്നുവെന്നും എന്നാല് ആക്രമണത്തെ അതിജീവിക്കാന് കഴിഞ്ഞിട്ടുണ്ടാകില്ലെന്നുമാണ് ഇസ്രയേല് മാധ്യമങ്ങള് റിപ്പോര്ട്ട് ചെയ്യുന്നത്.
ആക്രമണത്തിന് പിന്നാലെ ഗള്ഫ് മേഖലയിലാകെ സംഘര്ഷം പടര്ന്നു. ഇസ്രയേലിന് പുറമെ ഖത്തര്, ബഹ്റൈന്, സൗദി അറേബ്യ, യുഎഇ തുടങ്ങിയ രാജ്യങ്ങള്ക്ക് നേരെയും ഇറാന് പ്രത്യാക്രമണം നടത്തിയതോടെ മേഖല വലിയൊരു യുദ്ധത്തിന്റെ വക്കിലാണ്.
1989-ല് റുഹുള്ള ഖമേനിയുടെ മരണശേഷമാണ് അലി ഖമേനി അധികാരമേറ്റത്. കഴിഞ്ഞ 36 വര്ഷമായി ഇറാനിലെ അവസാന വാക്ക് ഖമേനിയുടേതായിരുന്നു.
