ബാംഗളൂരു : ക്ഷേത്ര നഗരമായ ധര്മസ്ഥലയിൽ ഒട്ടേറെ ദുരൂഹ മരണങ്ങളും ശവസംസ്ക്കാരങ്ങളും നടന്നു എന്നാരോപിക്കപ്പെടുന്ന സംഭവവുമായി ബന്ധപ്പെട്ട രേഖകളെല്ലാം പോലീസ് സ്റ്റേഷനില് നിന്ന് നീക്കംചെയ്തു എന്ന് വെളിപ്പെടുത്തല്.
2000 മുതല് 2015 വരെ ബെല്ത്തങ്ങാടി പോലീസ് സ്റ്റേഷന് പരിധിയിലുണ്ടായ അസ്വാഭാവിക മരണങ്ങളുമായി ബന്ധപ്പെട്ട രേഖകളാണിത്.
വിവരാവകാശപ്രവര്ത്തകനും ധര്മസ്ഥലയിലെ ആക്ഷന് കമ്മിറ്റി ഭാരവാഹിയുമായ ജയന്തിന് വിവരാവകാശനിയമപ്രകാരം നല്കിയ അപേക്ഷയിലാണ് പോലീസില്നിന്ന് ഈ മറുപടി ലഭിച്ചത്.
1995 മുതല് 2014 വരെയുള്ള കാലയളവില് ധര്മസ്ഥലയില് നൂറോളംപേരുടെ മൃതദേഹങ്ങള് കുഴിച്ചിട്ടെന്നായിരുന്നു ശുചീകരണത്തൊഴിലാളിയുടെ വെളിപ്പെടുത്തല്.
ഈ സാഹചര്യത്തില് ധർമസ്ഥലയ്ക്ക് തൊട്ടടുത്തുള്ള ബെൽത്തങ്ങാടി പോലീസ് സ്റ്റേഷനില്നിന്ന് 15 വര്ഷത്തെ അസ്വാഭാവിക മരണങ്ങളുമായി ബന്ധപ്പെട്ട രേഖകള് നീക്കംചെയ്തെന്ന് പറയുന്നതും ഏറെ ദുരൂഹമാണ്.
സ്റ്റേഷന് പരിധിയില്നിന്ന് കാണാതായവരുടെ വിവരങ്ങളും ചിത്രങ്ങളും അസ്വാഭാവിക മരണങ്ങളുടെ വിവരങ്ങളും അജ്ഞാതമൃതദേഹങ്ങളുടെ വിവരങ്ങളുമെല്ലാം തേടിയാണ് ജയന്ത് പോലീസില് വിവരാവകാശ നിയമപ്രകാരം അപേക്ഷ നല്കിയത്.
തിരിച്ചറിയാന് കഴിയാത്ത മൃതദേഹങ്ങളുമായി ബന്ധപ്പെട്ട പോസ്റ്ററുകള്, നോട്ടീസുകള്, ഇവരുടെ ചിത്രങ്ങള്, ഇവരുടെ പോസ്റ്റ്മോര്ട്ടം റിപ്പോര്ട്ടുകള് തുടങ്ങിയവയെല്ലാം നീക്കംചെയ്തെന്നായിരുന്നു പോലീസിൻ്റെ മറുപടി. കാണാതായവരുടെ പരാതികളും ചിത്രങ്ങളും നശിപ്പിച്ചു.സാധാരണ നടപടിക്രമങ്ങളുടെ ഭാഗമായുള്ള ഉത്തരവിനെത്തുടര്ന്നാണ് 15 വര്ഷത്തെ രേഖകള് സ്റ്റേഷനില്നിന്ന് നശിപ്പിച്ചതെന്നായിരുന്നു വിശദീകരണം.
അതിനിടെ, ജയന്തും പുതിയ പരാതിയുമായി പ്രത്യേക അന്വേഷണസംഘത്തെ സമീപിച്ചിട്ടുണ്ട്. ഒരു പെണ്കുട്ടിയുടെ മൃതദേഹം കുഴിച്ചിടുന്നതിന് താന് സാക്ഷിയായിട്ടുണ്ടെന്നായിരുന്നു ഇദ്ദേഹത്തിൻ്റെ അവകാശവാദം. മൃതദേഹം കുഴിച്ചിടുമ്പോള് ഒട്ടേറെ ഉദ്യോഗസ്ഥര് സ്ഥലത്തുണ്ടായിരുന്നതായും ഇദ്ദേഹം പറയുന്നു.
ഈ പരാതിയില് എസ്ഐടി എഫ്ഐആര് രജിസ്റ്റര്ചെയ്ത് ഉടന് അന്വേഷണം ആരംഭിക്കുമെന്നാണ് സൂചന.
