തിരുവനന്തപുരം:നിയമസഭ തിരഞ്ഞെടുപ്പ് ഒരുക്കങ്ങൾക്കിടയിൽ ഗതാഗത വകുപ്പ് മന്ത്രി കെ.ബി. ഗണേഷ് കുമാറിൻ്റെ രാഷ്ടീയ ഭാവി തുലാസിലായി.
വാളകത്തെ വീട്ടിൽ അദ്ദേഹത്തെ കാണാൻ പാടില്ലാത്ത സാഹചര്യത്തിൽ കണ്ടുവെന്ന് ഭാര്യ ബിന്ദു മേനോൻ. ഫോട്ടോകൾ മൊബൈലിൽ പകർത്തിയ ഭാര്യയെ മന്ത്രിയുടെ ഒപ്പമുള്ളവർ തടഞ്ഞുവെന്നും ഫോൺ കൈക്കലാക്കാൻ ശ്രമിച്ചുവെന്നും പറയുന്നു.
ശനിയാഴ്ച്ച ഉച്ചയ്ക്ക് രണ്ടു മണിയോടെയാണ് സംഭവം. വാളകത്തെ കുടുംബവീട്ടിൽ മുന്നറിയിപ്പില്ലാതെ എത്തിയ ഭാര്യ, ഗണേഷിനെ കാണാൻ പാടില്ലാത്ത സാഹചര്യത്തിൽ കാണുകയായിരുന്നു. മുൻ ഡിജിപി ആർ. ശ്രീലേഖയുടെ ഭർത്താവിൻ്റെ സഹോദരിയായ ബിന്ദു ഉടനെ അവരെ വിളിച്ച് പരാതിപ്പെട്ടു. സുരക്ഷയ്ക്കായി സർക്കാർ ഏർപ്പെടുത്തിയ 112 ടോൾ ഫ്രീ നമ്പറിൽ വിളിച്ച് സഹായം തേടാനാണ് ശ്രീലേഖ ഉപദേശിച്ചത്.
തുടർന്ന് തിരുവനന്തപുരത്തെ പോലീസ് ഹെഡ് ക്വാർട്ടേഴ്സിൽ കൈകാര്യം ചെയ്യുന്ന 112 നമ്പറിൽ ബന്ധപ്പെട്ട് സഹായം തേടി.എന്നാൽ താമസിയാതെ സ്ഥലത്തെത്തിയ പോലീസ് സംഭവത്തിൽ ഇടപെടാതെ മുങ്ങി. ഇതു സംബന്ധിച്ച് അന്വേഷിച്ചു വരികയാണെന്ന് സംസ്ഥാന പൊലീസ് മേധാവി രാവാഡ ചന്ദ്രശേഖർ പറഞ്ഞു….
വീട്ടിൽ തിരിച്ചുകയറിയ ബിന്ദു വീണ്ടും ഫോട്ടോകൾ എടുത്തു. ഭാര്യയിൽനിന്ന് മൊബൈൽ കൈക്കലാക്കാൻ സഹായികളായ പ്രദീപിനോടും ശാന്തനോടും നിർദേശം നൽകുകയാണ് മന്ത്രി ചെയ്തതെന്നാണ് ആരോപണം. ഇതനുസരിച്ച് മുറിയുടെ വാതിൽ കുറ്റിയിട്ട് സഹായികൾ ഇവരിൽനിന്ന് മൊബൈൽ തട്ടിപ്പറിക്കാൻ ശ്രമിച്ചു.ബഹളത്തിനിടയിൽ വാതിൽ തുറന്ന് പുറത്തിറങ്ങിയ ബിന്ദു വന്ന ടാക്സി കാറിൽ തിരിച്ചുപോവുകയായിരുന്നു. ശ്രീലേഖ ഈ വിവരങ്ങൾ സ്ഥിരികരിച്ചിട്ടുണ്ട്.
തനിക്കെതിരെ ഉയരുന്ന വിവാദങ്ങള് തെരഞ്ഞെടുപ്പിന്റെ ഭാഗമാണെന്ന് ഗതാഗതമന്ത്രി ഗണേഷ് കുമാര് പറഞ്ഞു.പത്തനാപുരം നിയമസഭാ മണ്ഡലത്തില് ഇത്തരം കഥകള്ക്ക് പ്രാധാന്യമില്ലെന്നും ആരോപണത്തിന് പിന്നില് കോണ്ഗ്രസാണെന്നും മന്ത്രി പ്രതികരിച്ചു. ഗണേഷ് കുമാറിന് പ്രണയമുണ്ടോ എന്നത് മാധവിക്കുട്ടിയോട് പ്രണയമുണ്ടോ എന്ന് ചോദിക്കുന്നത് പോലെയാണ്. ഗണേഷ് കുമാറിന് ഒന്നല്ല ഒരായിരം പ്രണയങ്ങളുണ്ടെന്നും തനിക്ക് എപ്പോഴും വീട്ടില് തന്നെയാണ് ശത്രുക്കളെന്നും അദ്ദേഹം പറഞ്ഞു.
വ്യക്തി ജീവിതത്തില് ഇടപെടാന് ആര്ക്കും അവകാശമില്ല. ഇപ്പോള് ഉയരുന്ന ആരോപണങ്ങള് ഭൂരിപക്ഷം കൂട്ടും. അതേസമയം മേയര് സ്ഥാനം കിട്ടാത്തതിന്റെ കൊതിക്കെറുവാണ് ശ്രീലേഖ തീര്ക്കുന്നതെന്നും ഇക്കാര്യത്തില് ഇടപെടാന് ശ്രീലേഖ ആരാണെന്നും മന്ത്രി ചോദിച്ചു. ആരോപണം ഉന്നയിക്കുന്നവര് ആസ്വദിക്കട്ടേയെന്നും അദ്ദേഹം പറഞ്ഞു. ഇത്തരം ആരോപണം ഉന്നയിക്കുന്നത് ഒരു രോഗമാണ്. നന്മ ചെയ്തിട്ടുണ്ടെങ്കില് ജനം ജയിപ്പിക്കുമെന്നും മന്ത്രി ആത്മവിശ്വാസം പ്രകടിപ്പിച്ചു.
