കൊച്ചി: വെനെസ്വലയിലെ അമേരിക്കൻ സൈനിക നടപടിയെ അപലപിക്കുന്നവർ, യുക്രെയിനു നേരെ റഷ്യ ആക്രമണം നടത്തിയപ്പോൾ ഇത്രത്തോളം രോഷം പ്രകടിപ്പിച്ചിരുന്നില്ലെന്ന് എഴുത്തുകാരനും മാധ്യമ പ്രവർത്തകനുമായ ജാവേദ് പർവേശ് ഫേസ്ബുക്ക് കുറിപ്പിൽ അഭിപ്രായപ്പെടുന്നു.
വെനെസ്വലയിൽ മരിച്ചത് നാല്പതോളം പേരാണ്. യുക്രെയിനിൽ കൊല്ലപ്പെട്ടത് ലക്ഷങ്ങളും. നാളെ തായ് വാനെ ചൈന സമ്പൂർണമായി വിഴുങ്ങിയാൽ കേരളത്തിൽ യുദ്ധവിരുദ്ധ റാലി ഉണ്ടാകുമോയെന്നും അദ്ദേഹം ചോദിക്കുന്നു.
അദ്ദേഹത്തിൻ്റെ ഫേസ്ബുക്ക് പോസ്ററ് ഇങ്ങനെ:
പരമാധികാര രാജ്യമായ യുക്രെയിനു നേരെ റഷ്യ ആക്രമണം നടത്തിയപ്പോൾ ഇത്രമാത്രം പ്രതിഷേധങ്ങളും റാലിയും കേരളത്തിൽ ഉണ്ടായിട്ടുണ്ടോ ?
പൊതുവായ യുദ്ധവിരുദ്ധ റാലിയല്ല, റഷ്യയെ അപലപിച്ചും ടെറിറ്റോറിയൽ ഇൻറഗ്രിറ്റി, പരമാധികാര രാജ്യം തുടങ്ങിയ പദാവലികളുമായി എത്ര റാലികൾ കേരളത്തിൽ നടന്നിട്ടുണ്ട് ? അതോ പേരിനെങ്കിലും റാലി നടന്നിട്ടുണ്ടോ? (എനിക്കറിയാത്തതുകൊണ്ട് ചോദിക്കുകയാണ്, ചിലപ്പോൾ നടന്നിരിക്കാം) ഇന്ന് പഞ്ചായത്തുകൾ തോറും വെനെസ്വലക്ക് പിന്തുണയുമായി റാലി നടക്കുകയാണ്. സത്യം പറഞ്ഞാൽ മലയാളി ലോകകാര്യങ്ങളിൽ താൽപര്യം പ്രകടിപ്പിക്കുന്നത് സന്തോഷകരമാണ്.
അന്ന് ദേശീയ ടെലിവിഷനുകളിലും മറ്റും വന്നിരുന്ന് സംസാരിച്ച ഇടതൻമാർ എന്ന് അവകാശപ്പെട്ടവർ റഷ്യയുടെ അധിനിവേശത്തെ തള്ളിപ്പറഞ്ഞെങ്കിലും, പരോക്ഷമായി റഷ്യയെ ന്യായീകരിക്കുന്നത് കേട്ടിട്ടുണ്ട്. നാറ്റോ ഭീഷണി, സ്ട്രാറ്റജിക് ഡൊമിനൻസ് എന്നെല്ലാം ഇവർ ആധികാരികമായി തള്ളിവിടുകയായിരുന്നു. അതായത് നിവൃത്തികെട്ടിട്ടാണ് റഷ്യ ആക്രമിച്ചതെന്നും അല്ലെങ്കിൽ റഷ്യയുടെ നിലനിൽപ് അപകടത്തിലാകും എന്നും പറഞ്ഞ്.
വെനെസ്വലയിലെ അമേരിക്കൻ സൈനിക നടപടിയിൽ നാൽപതോളം പേർ മരിച്ചുവെന്നാണ് വാർത്ത. പ്രസിഡന്റിനെ പിടിച്ചുകൊണ്ടുപോകുകയും ചെയ്തു. ലക്ഷങ്ങളാണ് റഷ്യ-യുക്രെയിൻ യുദ്ധത്തിൽ കൊല്ലപ്പെട്ടത്. സിവിലിയൻ മരണം മാത്രം ഔദ്യോഗിക കണക്കനുസരിച്ച് പതിനയ്യായിരം.
കേരളത്തിൽ നിന്ന് യുക്രെയിനിലേക്കുള്ള ദൂരത്തിന്റെ ഇരട്ടിയിലധികമുണ്ട് വെനെസ്വലയിലേക്ക്. നാളെ തായ് വാനെ ചൈന സമ്പൂർണമായി വിഴുങ്ങിയാൽ കേരളത്തിൽ യുദ്ധവിരുദ്ധ റാലി ഉണ്ടാകുമോ ?
രാജ്യങ്ങളുടെ പരമാധികാരം എന്നത് എന്തോ പുണ്യപുരാതനമായ, പവിത്രമായ കാര്യമായിട്ടാണ് മാക്രികളും അനാക്രികളും ഇപ്പോൾ കരുതുന്നത്. ധാർമികമായി പറഞ്ഞാൽ മനുഷ്യവകാശത്തേക്കാൾ വലുതല്ല രാജ്യങ്ങളുടെ പരമാധികാരം. വലിയ തോതിലുള്ള മനുഷ്യവകാശലംഘനം, വംശഹത്യ എന്നിവ നടന്നാൽ രാജ്യാന്തര സമൂഹം ഇടപെടണം.
കാരണം മനുഷ്യനേക്കാൾ വലതല്ല ഭരണകൂടം. ഇതിന് ചില രാജ്യാന്തരനിയമങ്ങൾ പാലിക്കണം എന്നു മാത്രം. അത് വെനെസ്വലയുടെ കാര്യത്തിൽ ഉണ്ടായില്ല. യുക്രെയിനിന്റെ കാര്യത്തിലും ഉണ്ടായില്ല. ശക്തിയുള്ള രാജ്യത്തിന് ചെറിയ രാജ്യങ്ങളെ കീഴ്പ്പെടുത്താൻ അത് കാരണമാകും.ലോകക്രമം മാറ്റും.
മറ്റൊരു ഉദാഹരണം പറഞ്ഞാൽ ബംഗ്ലദേശിലെ ന്യൂനപക്ഷ ഹിന്ദുക്കൾക്കു നേരെ നടക്കുന്ന ആക്രമണങ്ങളും ചിറ്റഗോങ് മലനിരകളിലെ ബുദ്ധിസ്റ്റ് ചക്മകൾക്കു നേരെ നടക്കുന്ന ആക്രമണങ്ങളും നാളെ എന്തെങ്കിലും കാരണവശാൽ systemic persecution ആയി മാറുകയാണെങ്കിൽ ഇടപെടേണ്ട ധാർമിക ഉത്തരവാദിത്വം ഇന്ത്യക്കാണ്.
One Response
ഇന്ത്യ വിഴുങ്ങിയ ആ ഹിമാലയൻ രാജ്യത്തിലും ആളുകൾ ഉണ്ടാവില്ലേ?
റഷ്യയായാലും അമേരിക്ക ആയാലും ഇന്ത്യയായാലും ഒരു സ്വതന്ത്ര രാജ്യത്തിൻ്റെ തെരഞ്ഞെടുത്ത ഭരണാധികാരിയെ തട്ടിക്കൊണ്ടു പോയി രാജ്യത്തെ കീഴടക്കുന്നത് തെമ്മാടിത്തരം തന്നെ. അവിടെ ആരുഭരിക്കണമെന്ന് തീരുമാനിക്കാനുള്ള ജനങ്ങളുടെ അവകാശമാണ് റദ്ദാക്കിയത്. അത് അപലപനീയം തന്നെ.