ന്യൂഡൽഹി: കേരളത്തിലടക്കം തീവ്ര വോട്ടർ പട്ടിക പുതുക്കൽ രാജ്യവ്യാപകമാക്കാൻ കേന്ദ്ര തിരഞ്ഞെടുപ്പ് കമ്മീഷൻ തീരുമാനിച്ചു. തയാറെടുപ്പുകൾ ഈ മാസം തന്നെ പൂർത്തിയാക്കി അടുത്തമാസം പുതുക്കൽ നടപടികൾ ആരംഭിക്കാനാണ് നീക്കം.
വോട്ടർ പട്ടികയുടെ കൃത്യത ഉറപ്പാക്കാനാണ് ശ്രമമെന്ന് തിരഞ്ഞെടുപ്പ് കമ്മീഷൻ വൃത്തങ്ങൾ വ്യക്തമാക്കി.കേരളം, തമിഴ്നാട്,പശ്ചിമ ബംഗാൾ, അസാം, പുതുച്ചേരി എന്നിവിടങ്ങളിൽ അടുത്ത വർഷം നിയമസഭാ തിരഞ്ഞെടുപ്പ് നടക്കാനിരിക്കെയാണിത്.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ അധ്യക്ഷതയിൽ ചേർന്ന കമ്മീഷന്റെ യോഗത്തിൽ ഇതുസംബന്ധിച്ച രൂപരേഖ തയാറാക്കി.
വോട്ടർ പട്ടികയിൽ ഇടം നൽകാൻ ഏതെല്ലാം രേഖകൾ സ്വീകരിക്കാമെന്ന വിഷയത്തിലും ചർച്ച നടന്നു. പ്രാദേശികമായ രേഖകൾ അടക്കം സ്വീകരിക്കണമോ എന്നതടക്കമുള്ള കാര്യങ്ങളിൽ ഉടൻ അന്തിമ തീരുമാനമെടുക്കും.
