കാരണഭൂതൻ്റെ ശരീരസൗന്ദര്യവും ഇ എം എസിൻ്റെ ഉയരവും…..

ക്ഷത്രിയൻ ..

പൊക്കമില്ലായ്മയാണെൻ പൊക്കമെന്ന് പറഞ്ഞ കവി കുഞ്ഞുണ്ണിമാഷ് ജീവിച്ചിരിപ്പില്ലാത്തത് നന്നായി.

അല്ലെങ്കിൽ എട്ടുമുക്കാൽ അട്ടിവെച്ചത് പോലെയെന്ന കാരണഭൂതൻ ഫലിതത്തിൽ മാഷും ഉൾപ്പെട്ടേനെ. നിയമസഭയിൽ, പ്രതിപക്ഷ നിരയിലെ പൊക്കം കുറഞ്ഞ അംഗത്തെ പരിഹസിക്കാനാണ് മുഖ്യമന്ത്രി എട്ടുമുക്കാൽ ‘അട്ടിവച്ചത്’.

പൊക്കം കുറഞ്ഞവരെക്കുറിച്ച് പരിഹാസം ചൊരിയാൻ നിയമസഭയ്ക്കകത്ത് എന്നല്ല, ഭൂമി മലയാളത്തിൽതന്നെ കേമനാണ് കാരണഭൂതൻ. അമിതാഭ് ബച്ചൻ്റെ ഉയരവും ഷാരൂഖ് ഖാൻ്റെ സൗന്ദര്യവും സൽമാൻ ഖാൻ്റെ നിറവുമൊക്കെ സമന്വയിച്ച മറ്റാരുണ്ട് കേരളത്തിൽ.

അത് ബോളിവുഡ്ഡ് പ്രയോഗമായെങ്കിൽ ക്ഷമിക്കുക. മമ്മൂട്ടിയുടെ ഗാംഭീര്യവും മോഹൻ ലാലിൻറെ സൗന്ദര്യവും ഒന്നിച്ച് വഴിഞ്ഞൊഴുകുന്ന ശരീരം കേരളത്തിൽ കാരണഭൂതന് അല്ലാതെ മറ്റാർക്കെങ്കിലുമുണ്ടോ?

പൊക്കക്കുറവ് ഒരു കുറവാണെന്ന് ധരിച്ചുവച്ചിരിക്കുന്നവരുടെ കൂട്ടത്തിലാണ് മുഖ്യനെന്ന് തോന്നുന്നു. മലയാളത്തിൽ അടുത്ത കാലത്തായി പ്രചാരത്തിലുള്ള വാക്കാണ് ശരീരഭാഷ.

ചാനലുകൾ പ്രചാരത്തിലായതോടെയാണ് ശരീരഭാഷ എന്ന വാക്കിനും പ്രചാരം സിദ്ധിച്ചത്. ആരെങ്കിലും എന്തെങ്കിലും പ്രതികരിച്ചാൽ പ്രതികരണത്തെയല്ല, പ്രതികരിച്ചയാളുടെ ശരീരഭാഷയെയാണ് മലയാളികൾ ഇപ്പോൾ നിരീക്ഷിക്കാറുള്ളത്. ബോഡി ലാംഗ്വേജിൽനിന്ന് ബോഡി ഷെയ്മിങ്ങിലേക്കുള്ള പരിണാമമാണ് എട്ടുമുക്കാൽ പ്രയോഗംവഴി മുഖ്യനിലുണ്ടായിട്ടുള്ളത്.

മുഖ്യൻ്റെ വാദം അംഗീകരിച്ചാൽ പൊക്കം കുറഞ്ഞവരൊക്കെ വീട്ടിൽ കെട്ടിപ്പൂട്ടിയിരിക്കണമെന്ന് തോന്നും. അവരൊന്നും നിയമസഭയിൽ എത്തേണ്ടവരല്ലെന്ന സന്ദേശവും ആ പ്രയോഗത്തിലുണ്ട്. അഥവാ സഭയിൽ എത്തിയാൽ തന്നെ പഞ്ചപുച്ഛമടക്കി ഇരുന്നോളമെന്നും.

അംഗങ്ങളുടെ ഉയരമളക്കാൻ തുടങ്ങിയാൽ ഉയരം കുറഞ്ഞവർ പ്രതിപക്ഷത്ത് മാത്രമല്ല ഉള്ളതെന്ന കാര്യം മുഖ്യൻ മറന്നതായി തോന്നുന്നു. മുഖ്യൻ അവഹേളിച്ചുവെന്ന് പറയുന്ന അംഗത്തിന് ഉയരം കുറവാണെങ്കിലും ആവശ്യത്തിലേറെ വണ്ണമെങ്കിലുമുണ്ട്.

ഉയരത്തൊനൊപ്പം ആവശ്യത്തിന് വണ്ണവുമില്ലാത്ത അംഗം തെക്കൻ ജില്ലയിൽനിന്ന് ഭരണപക്ഷത്തുമുണ്ടെന്ന കാര്യം മറന്നാണ് കാരണഭൂതൻ ഉപമയുമായി വന്നതെന്ന് സഭയിലെ അംഗങ്ങളുടെ ചിത്രം മനോമുകുരത്തിലൂടെ കടത്തിവിട്ടാൽ ഏത് മലയാളിക്കും മനസിലാകും. അങ്ങനെയൊരു ശരീരപ്രകൃതിയാകാം സിപിഎമ്മിൽ തുടങ്ങി കോൺഗ്രസിലൂടെ മൂന്നാമതൊരു പാർട്ടിയിലും അതുവഴി നിയമസഭയിലുമെത്താൻ കക്ഷിക്ക് തുണയായതെന്നും കരുതുക.

ഇനി ഉയരക്കുറവ് അത്രവലിയ കുറവാണെങ്കിൽ മുഖ്യൻ്റെ പരിഹാസം ചെന്ന് തറക്കുന്നവരിൽ സാക്ഷാൽ ഇ.എം.എസ്.നമ്പൂതിരിപ്പാടും ഉൾപ്പെടും. ഇന്ത്യയിൽ പുരുഷന്മാരുടെ ശരാശരി ഉയരം എന്നത് 5 അടി 7 ഇഞ്ച് ആണ്. ഇ.എം.എസിൻ്റെ ഉയരം അതിലും കുറവാണെന്ന് തിരിച്ചറിയാൻ നമ്പൂതിരിപ്പാടിനെ കാണണമെന്നില്ല, അദ്ദേഹത്തിൻ്റെ ചിത്രം കണ്ടാൽ മതി. ലാൽ ബഹദൂർ ശാസ്ത്രി എന്നൊരു പ്രധാനമന്ത്രിയുണ്ടായിട്ടുണ്ട് ഇന്ത്യയിൽ. കുറിയ മനുഷ്യരുടെ കൂട്ടത്തിലായിരുന്നു പ്രശസ്തനായ ശാസ്ത്രിയുടെ സ്ഥാനം.

രാഷ്ട്രപിതാവ് മഹാത്മാഗാന്ധിയും ഉയരം കൊണ്ടല്ല കീർത്തി നേടിയത്. 5 അടി 5 ഇഞ്ച് മാത്രം ഉയരമുണ്ടായിരുന്ന ഗാന്ധിജിയാണ് ഇന്ത്യ കണ്ട ഏറ്റവും ഉന്നതനായ നേതാവ്.
രാഷ്ട്രീയത്തിൽ എന്നല്ല, സകല മേഖലകളിലും പൊക്കക്കുറവിലും പൊക്കത്തോടെ ജ്വലിച്ചുനിന്ന ഉന്നതർ പലരുമുണ്ട്.

അത് ഇന്ത്യയിൽ മാത്രമല്ല, ലോകത്തെമ്പാടുമുണ്ട്. വിഖ്യാതനായ അമേരിക്കൻ നടനും നിർമാതാവുമായ പീറ്റർ ഡിങ്ക്ലേജിന് ഉയരം 4 അടി 4 ഇഞ്ച് മാത്രമായിരുന്നു. പ്രമുഖ ഇംഗ്ലീഷ് നടനും ടെലിവിഷൻ അവതാരകനുമായവാർവിക് ഡേവിസിൻറെ ഉയരം 3 അടി 6 ഇഞ്ച് ആയിരുന്നുവെന്ന് കാരണഭൂതനെ ആരെങ്കിലും ഓർമിപ്പിച്ചാൽ നന്നാകും.

വെറും 4 അടി 1 ഇഞ്ച് ഉയരം കൊണ്ടാണ് അമേരിക്കൻ നടൻ മാർട്ടിൻ ക്ലെബ സിനിമാലോകം കീഴടക്കിയത്. ഇംഗ്ലീഷ് നടനും സംഗീതജ്ഞനുമായ കെന്നി ബേക്കറിൻ്റെ ഉയരം 3 അടി 8 ഇഞ്ച് ആയിരുന്നു. ഇന്ത്യൻ ഹാസ്യനടൻ ലില്ലിപുട്ട് എന്ന എം.എം.ഫാറൂഖി, രാജ്യാന്തര കായികതാരം രാജണ്ണ എന്നിവർ 3 അടി 10 ഇഞ്ചുകാരാണ്.

ഉയരം കുറഞ്ഞവരുടെ കോക കായിക മേളയിൽ മികവ് പുലർത്തിയ മലയാളി ജോബി മാത്യുവിന് ഉയരം 3 അടി 6 ഇഞ്ച്. മലയാളത്തിൻ്റെ സ്വന്തം ഗിന്നസ് പക്രു 2അടി1.2 ഇഞ്ചുകാരനാണെന്നതും മറക്കേണ്ട. അവരൊന്നും എട്ടുമുക്കാൽ അട്ടിവച്ചത് പോലെയല്ല അവരവരുടെ മേഖലകളിൽ വെച്ചടിവച്ചടി ഉയർന്നുവന്നതെന്ന് ഓർമ്മിക്കാൻ കഴിയാത്തതാണ് കാരണഭൂതൻ്റെ പിഴവ്.

ഓർമ്മക്കുറവിന് ഇംഗ്ലീഷിൽ പറയുന്ന പേരെന്താണാവോ.. അൽഷിമേഴ്സ് എന്ന് തന്നെയല്ലേ..