ലോക ചരിത്രത്തിലെ ഏറ്റവും വലിയ സാമ്പത്തിക തകർച്ച ഈ വർഷം ?

ദുബായ്: വിഖ്യാത സാമ്പത്തിക വിദഗ്ധനും ‘റിച്ച് ഡാഡ് പുവർ ഡാഡ്’ എന്ന വിൽപനയിൽ റെക്കോഡിട്ട പുസ്തകത്തിന്‍റെ രചയിതാവുമായ റോബർട്ട് കിയോസ്‌കി ലോകത്തിന് നൽകിയിരിക്കുന്നത് ഞെട്ടിക്കുന്ന മുന്നറിയിപ്പാണ്. “ലോക ചരിത്രത്തിലെ ഏറ്റവും വലിയ തകർച്ച” ഈ വർഷം സംഭവിക്കുമെന്നാണ് അദ്ദേഹത്തിന്റെ പ്രവചനം.

തകർച്ചയിൽ ഓഹരി വിപണികൾ മാത്രമല്ല, പരമ്പരാഗത നിക്ഷേപമായ സ്വർണ്ണം പോലും വീഴുമെന്നും അദ്ദേഹം പറയുന്നു.ഓഹരി വിപണി തകരുമ്പോൾ സാധാരണയായി കുതിച്ചുയരുന്ന സ്വർണ്ണത്തിൻ്റെ മൂല്യത്തിന് ഇത്തവണ കാര്യമായ പ്രസക്തിയുണ്ടാവില്ല എന്നാണ് കിയോസ്‌കിയുടെ വിലയിരുത്തൽ. സ്വർണ്ണം അതിൻ്റെ പ്രഭാവം നഷ്ടപ്പെടുത്തുമെന്ന് വിശ്വസിക്കുന്ന വിദഗ്ധരുടെ എണ്ണം വർധിക്കുന്നതായും അദ്ദേഹം ചൂണ്ടിക്കാട്ടുന്നു. ഈ സാഹചര്യത്തിൽ, നിക്ഷേപകർക്ക് മികച്ച നേട്ടം നേടാനായി കിയോസ്‌കി നിർദേശിക്കുന്ന രണ്ട് ആസ്തികൾ വെള്ളിയും എതേറിയവും ആണ്.

താരതമ്യേന വില കുറഞ്ഞ ഈ ലോഹങ്ങളുടെ വ്യാവസായിക ആവശ്യകത വർധിക്കുന്നതാണ് മുന്നേറ്റത്തിന് കാരണമായി അദ്ദേഹം കാണുന്നത്. സാങ്കേതികവിദ്യയിലും മറ്റ് വ്യവസായങ്ങളിലും വെള്ളിയുടെയും എതേറിയത്തിൻ്റെയും ഉപയോഗം വർധിക്കുന്നത് അവയുടെ മൂല്യം ഉയർത്തുമെന്നാണ് കിയോസ്‌കിയുടെ കണക്കുകൂട്ടൽ.

വരാനിരിക്കുന്ന സാമ്പത്തിക തകർച്ചയുടെ പ്രധാന കാരണങ്ങളിലൊന്ന് ‘ബേബി ബൂമേഴ്‌സ്’ എന്ന ജനവിഭാഗത്തിൻ്റെ വിരമിക്കൽ പ്രതിസന്ധിയായിരിക്കും എന്നാണ് റോബർട്ട് കിയോസ്‌കി കരുതുന്നത്. രണ്ടാം ലോക മഹായുദ്ധത്തിനുശേഷം 1960-കളുടെ തുടക്കം വരെ ജനിച്ചവരാണ് ബേബി ബൂമേഴ്‌സ്.

വരാനിരിക്കുന്ന തകർച്ച പരമ്പരാഗത സമ്പാദ്യങ്ങളെയും, വിരമിക്കൽ അക്കൗണ്ടുകളെയും തകർക്കും. ഇതോടെ നിരവധി ‘ബൂമേഴ്‌സ്’ വീടില്ലാത്തവരാകുകയോ, തങ്ങളുടെ മക്കളുടെ കീഴിൽ താമസിക്കേണ്ടി വരികയോ ചെയ്യുമെന്ന് കിയോസ്‌കി പ്രവചിക്കുന്നു. ഈ വർഷം തന്റെ പുസ്തകത്തിൽ പ്രവചിച്ച ലോക ചരിത്രത്തിലെ ഏറ്റവും വലിയ തകർച്ച സംഭവിക്കുമെന്നും അദ്ദേഹം കൂട്ടിച്ചേർത്തു.

സ്വർണ്ണത്തിനും മറ്റ് കമ്മോഡിറ്റികൾക്കും പിന്നിലുള്ള പിന്തുണയില്ലാത്ത കറൻസികളെയാണ് ഫിയറ്റ് കറൻസികൾ എന്ന് വിളിക്കുന്നത്. ഇന്ത്യൻ രൂപ ഉൾപ്പെടെയുള്ള രാജ്യങ്ങളിലെ കറൻസികൾ ഈ ഗണത്തിൽപ്പെടും. പണപ്പെരുപ്പം ഇത്തരം കറൻസികളെ വെറും കടലാസുകളാക്കി മാറ്റുമെന്നും, സമ്പാദ്യം കറൻസികളായി സൂക്ഷിക്കുന്നവർ തകരുമെന്നും അദ്ദേഹം മുന്നറിയിപ്പ് നൽകുന്നു.

ഭാവി മുൻകൂട്ടി കാണുന്ന നിക്ഷേപകർ കേവലം ഫിയറ്റ് കറൻസികളിൽ കുടുങ്ങരുത്. പകരം, സ്വർണ്ണം, വെള്ളി, ബിറ്റ്‌കോയിൻ, എതേറിയം പോലുള്ള ഡിജിറ്റൽ ആസ്തികൾ ശേഖരിക്കണം. ഇതിൽ ഏറ്റവും മികച്ച ഓപ്ഷനായി അദ്ദേഹം എടുത്തുപറയുന്നത് വെള്ളിയും എതേറിയവുമാണ്. ഫിസിക്കൽ കമ്മോഡിറ്റികളും (വെള്ളി), ഡിജിറ്റൽ കമ്മോഡിറ്റികളും (എതേറിയം) സംയോജിപ്പിച്ചുള്ള നിക്ഷേപം പ്രതിസന്ധിയിൽ രക്ഷപ്പെടാൻ സഹായിക്കുമെന്നാണ് ഈ നിക്ഷേപ വിദഗ്ധൻ്റെ അഭിപ്രായം.