തിരുവനന്തപുരം : മൂന്നാമത്തെ ബലാത്സംഗ പരാതിയിൽ അറസ്റ്റിലായ പാലക്കാട് എം എൽ എ രാഹുൽ മാങ്കൂട്ടത്തിലിനെതിരെ കടുത്ത നടപടിക്കൊരുങ്ങി നിയമസഭ സ്പീക്കർ എ എൻ ഷംസീർ.
രാഹുലിനെ അയോഗ്യനാക്കുന്നതിൽ നിയമപദേശം തേടുമെന്ന് അദ്ദേഹം വ്യക്തമാക്കി. കോൺഗ്രസ് പാർട്ടിയിൽ നിന്ന് രാഹുൽ മാങ്കൂട്ടത്തിലിനെ പുറത്താക്കിയിരുന്നു.
രാഹുലിൻ്റെ അറസ്റ്റ് നിയമസഭയുടെ എത്തിക്സ് – പ്രിവിലേജസ് കമ്മിറ്റി പരിശോധിക്കും. തുടർച്ചയായി പരാതികൾ വരുന്ന സാഹചര്യത്തിൽ രാഹുൽ എംഎൽഎ സ്ഥാനത്ത് തുടരുന്നത് തെറ്റായ സന്ദേശം നൽകുമെന്നും നിയമത്തിനുള്ളിൽ നിന്നുകൊണ്ടുമാത്രമേ തനിക്ക് പ്രവർത്തിക്കാൻ സാധിക്കൂവെന്നും ഷംസീർ പറഞ്ഞു.
ഇന്നലെ അർധരാത്രി അറസ്റ്റിലായ രാഹുലിനെ പത്തനംതിട്ട ജില്ലാ കോടതി മജിസ്ട്രേറ്റ് 14 ദിവസത്തേക്ക് റിമാൻഡ് ചെയ്തു. ജാമ്യാപേക്ഷ തള്ളിക്കൊണ്ടാണ് ഈ നടപടി.
രാഹുലിനെ മാവേലിക്കര പ്രത്യേക ജയിലിലാക്കും. വിദേശത്ത് താമസിക്കുന്ന മലയാളി യുവതിയുടെ ബലാത്സംഗ പരാതിയിലാണ് അറസററ്.
നേത്തെ രണ്ട് ബലാത്സംഗ കേസുണ്ടായിരുന്ന രാഹുലിനെ മൂന്നാം ബലാത്സംഗ കേസിൽ പൊലീസ് രഹസ്യ നീക്കത്തിലൂടെയാണ് പിടികൂടിയത്
പാലക്കാട് നിന്ന് അറസ്റ്റിലായ രാഹുല്, പ്രത്യേക അന്വേഷണ സംഘത്തിൻ്റെ ചോദ്യം ചെയ്യലിനോട് നിസ്സഹകരിക്കുന്നുവെന്നാണ് റിപ്പോര്ട്ടുകള്. പത്തനംതിട്ട എ ആര് ക്യാംപില് ഡിഐജി ജി പൂങ്കുഴലിയുടെ നേതൃത്വത്തിലാണ് ചോദ്യം ചെയ്യല്. രാഹുലിൻ്റെ ഫോണുകള് പൊലീസ് കസ്റ്റഡിയിലെടുത്തിട്ടുണ്ട്. ഇതില് ഐ ഫോണിന്റെ പാസ് വേര്ഡ് അദ്ദേഹം വെളിപ്പെടുത്താന് വിസമ്മതിച്ചു.
പരാതിക്കാരിയെ അറിയില്ലെന്നും, വിദേശത്തു നിന്നും ഇമെയിലായി വന്ന പരാതിയില് കഴമ്പില്ലെന്നുമാണ് രാഹുല് ആദ്യം പറഞ്ഞത്. എന്നാല് ഡിജിറ്റല് തെളിവുകള് അടക്കം നിരത്തി ചോദ്യം ചെയ്തപ്പോൾ മറുപടിയുണ്ടായില്ല. പരാതിക്കാരിയുടെ രഹസ്യമൊഴി നേരത്തെ പൊലീസ് ശേഖരിച്ചിരുന്നു. തുടര്ന്ന് കൃത്യമായ തെളിവുകള് എല്ലാം പൂങ്കുഴലിയുടെ നേതൃത്വത്തില് ശേഖരിച്ചിരുന്നു എന്നാണ് പറയുന്നത്.
തെളിവുകള് നിരത്തിയുള്ള നിരന്തര ചോദ്യം ചെയ്യലില് യുവതിയെ അറിയാമെന്ന് രാഹുല് സമ്മതിച്ചു. ബലാത്സംഗം ചെയ്തിട്ടില്ല. ഉഭയ സമ്മതപ്രകാരമുള്ള ബന്ധമാണ് ഉണ്ടായിരുന്നത്. ഭ്രൂണഹത്യയ്ക്ക് നിര്ബന്ധിച്ചിട്ടില്ല. സാമ്പത്തിക ചൂഷണം ഉണ്ടായിട്ടില്ലെന്നും രാഹുല് പറഞ്ഞുവെന്നാണ് സൂചന.
സൈബര്, ഫോറന്സിക്, വിരലടയാള വിദഗ്ധരെയെല്ലാം രാഹുലിനെ ചോദ്യം ചെയ്യുന്ന പത്തനംതിട്ട എ ആര് ക്യാംപിലെത്തിച്ചിരുന്നു. ഹോട്ടലില് നിന്നും കസ്റ്റഡിയിലെടുത്തത് അടക്കമുള്ള തെളിവുകള് പരിശോധിക്കാനാണ് സംഘത്തെയെത്തിച്ചത്. രാഹുലിൻ്റെ ഫോണുകളെല്ലാം വിശദ പരിശോധനയ്ക്കായി ഫോറന്സിക് ലാബിലേക്ക് അയയ്ക്കാനാണ് തീരുമാനം.
2024 ഏപ്രില് മാസത്തിലാണ് ക്രൂര പീഡനം നടന്നത് എന്ന് പറയുന്നു. പത്തനംതിട്ട സ്വദേശിനി ഇ-മെയില് വഴി നല്കിയ പരാതിയിലാണ് പൊലീസ് സംഘം രാഹുലിനെ പാലക്കാട്ടെ കെപിഎം റീജ്യന്സി ഹോട്ടലില് നിന്നും രാത്രി 12.30 ഓടെ കസ്റ്റഡിയിലെടുത്തത്. പരാതിക്കാരിയുടെ മൊഴി പ്രത്യേക അന്വേഷണ സംഘം രേഖപ്പെടുത്തിയതിന് പിന്നാലെയാണ് ഈ നീക്കം.
ഗര്ഭിണിയായ യുവതി ഭ്രൂണത്തിന്റെ ഡിഎന്എ പരിശോധനയ്ക്ക് ഒരുങ്ങിയെന്നും ലാബ് രാഹുലിനോട് സാമ്പിള് ആവശ്യപ്പെട്ടുവെന്നുമാണ് മൊഴി. പക്ഷെ, ഡിഎന്എ പരിശോധനയോട് രാഹുല് സഹകരിച്ചില്ല. ഇതിനുള്ള തെളിവുകള് തന്റെ പക്കല് ഉണ്ടെന്നും പരാതിക്കാരി അന്വേഷണ സംഘത്തിന് മൊഴി നല്കി.
വിവാഹബന്ധത്തില് പ്രശ്നങ്ങള് നേരിടുന്ന സമയത്താണ് രാഹുല് സാമൂഹിക മാധ്യമം വഴി പരിചയപ്പെട്ടത്. പിന്നീട് താനുമായി പ്രണയ ബന്ധം സ്ഥാപിക്കുകയും വിവാഹ ബന്ധം വേര്പെടുത്താന് ആവശ്യപ്പെടുകയും ചെയ്തു. രാഹുല് തന്നെ വിവാഹം കഴിക്കാമെന്ന് വാഗ്ദാനം നല്കിയെന്നും യുവതിയുടെ മൊഴിയിലുണ്ട്.
തന്നെ വിട്ട് പോകാതിരിക്കാന് ഒരു കുഞ്ഞ് വേണം എന്ന് രാഹുല് നിര്ബന്ധിച്ചു. ഒരു കുഞ്ഞുണ്ടായാല് വീട്ടില് വിവാഹം വളരെ വേഗം സമ്മതിക്കുമെന്നും രാഹുല് പറഞ്ഞു. നേരില് കാണാന് രാഹുല് ആഗ്രഹം പ്രകടിപ്പിച്ചു. റസ്റ്റോറന്റില് കാണാം എന്ന് പറഞ്ഞപ്പോള് പൊതുപ്രവര്ത്തകന് ആയതിനാല് പൊതുവിടത്തില് കാണാന് ആകില്ലെന്ന് പറഞ്ഞു.
ഒരു ഹോട്ടലിന്റെ പേര് നിര്ദേശിച്ച് അവിടെ റൂം ബുക്ക് ചെയ്യാന് പറഞ്ഞു. റൂമില് എത്തിയപാടെ ഒരു വാക്ക് പോലും പറയുന്നതിന് മുമ്പേ തന്നെ കടന്നാക്രമിച്ചുവെന്നും നേരിട്ടത് ക്രൂരമായ ലൈംഗിക ആക്രമണം ആണെന്നും പരാതിക്കാരി പൊലീസിന് മൊഴി നല്കി.
തന്നെ മുഖത്ത് അടിക്കുകയും തുപ്പുകയും ദേഹത്ത് പലയിടത്തും മുറിവുണ്ടാകുകയും ചെയ്തു. ഓവുലേഷന് ഡേറ്റ് ആണെന്ന് പറഞ്ഞിട്ടും കുഞ്ഞുണ്ടാകട്ടെ എന്ന് പറഞ്ഞ് ലൈംഗിക ബന്ധത്തില് ഏര്പ്പെട്ടു. ഇതിന് ശേഷം വീണ്ടും തന്നെ കാണണം എന്ന് ആവശ്യപ്പെട്ടെങ്കിലും പോയില്ല.
ഗര്ഭിണിയാണെന്ന വിവരം അറിയിച്ചപ്പോള് അസഭ്യം പറയുകയാണുണ്ടായത്. മറ്റ് ആരുടെയെങ്കിലും കുഞ്ഞാകും എന്ന് അധിഷേപിച്ചു. അതില് മനം നൊന്താണ് ഡിഎന്എ പരിശോധനക്കായി പോയത്. പിന്നാലെ രാഹുലിൻ്റെ ഭാഗത്ത് നിന്ന് ഗര്ഭഛിദ്രത്തിനുള്ള കടുത്ത സമ്മര്ദ്ദം ഉണ്ടായി. അപമാനവും ഭീഷണികളും തന്നെ കടുത്ത ശാരീരിക, മാനസിക സമര്ദത്തില് ആക്കിയെന്നും യുവതിയുടെ മൊഴിയില് പറയുന്നു.
തുടര്ന്ന് ഗര്ഭം അലസി. അബോര്ഷന് വിവരം പറയാന് വിളിച്ചപ്പോള് രാഹുല് തന്നെ ഫോണില് ബ്ലോക്ക് ചെയ്തു. ഇ-മെയിലിനും മറുപടിയില്ലായിരുന്നു. ഒടുവില് രാഹുലിൻ്റെ സുഹൃത്തും സഹായിയുമായ ഫെനി നൈനാനെ വിവരം അറിയിച്ചു.
കടുത്ത ശാരീരിക, മനസിക പ്രശ്നങ്ങള് താന് ഇപ്പോഴും അനുഭവിക്കുന്നുണ്ട്. എന്നാല് പാലക്കാട് ഉപതെരഞ്ഞെടുപ്പ് സമയത്ത് ഒന്നും സംഭവിക്കാത്ത പോലെ രാഹുല് വീണ്ടും ബന്ധപ്പെട്ടു. തകര്ന്നിരുന്ന തന്നോട് വീണ്ടും അടുപ്പത്തിന് ശ്രമിച്ചു. ഭാവിയില് ഒരുമിച്ച് ജീവിക്കാം എന്നും വാഗ്ദാനം നല്കി. പാലക്കാട് ഒരു ഫ്ലാറ്റ് വാങ്ങി തരണമെന്നും ഒരുമിച്ച് അവിടെ വിവാഹം കഴിച്ചു ജീവിക്കാമെന്നും പറഞ്ഞു.
ഫ്ലാറ്റ് വാങ്ങല് നടന്നില്ല. എങ്കിലും പലപ്പോഴായി രാഹുല് തന്നില് നിന്നും സാമ്പത്തിക സഹായം കൈപ്പറ്റിയെന്നും യുവതി പറയുന്നു. വിലകൂടിയ വാച്ചുകളും വസ്ത്രങ്ങളും ചെരുപ്പുകളും സൗന്ദര്യ വര്ദ്ധക വസ്തുക്കളും വാങ്ങി നല്കി. രാഹുലിനെതിരെ ലൈംഗികാതിക്രമ പരാതികള് ഉയര്ന്നപ്പോ അതില് വസ്തുതയുണ്ടെന്ന് മനസ്സിലാക്കി. പരാതിയുമായി താനും മുന്നോട്ട് പോകുമെന്ന് മനസ്സിലാക്കിയ രാഹുല് ഭീഷണിപ്പെടുത്തിയെന്നും കുടുംബത്തെ ഇല്ലാതാക്കുമെന്നും സഹോദരിയെയും അച്ഛനെയും അമ്മയെയും അപായപ്പെടുത്തുമെന്നും രാഹുല് ഭീഷണി മുഴക്കിയെന്നും പരാതിക്കാരിയുടെ മൊഴിയില് പറയുന്നു.
പത്തനംതിട്ട ജനറൽ ആശുപത്രിയിൽ വൈദ്യപരിശോധനയ്ക്കെത്തിച്ചപ്പോൾ രാഹുൽ മാങ്കൂട്ടത്തിൽ എംഎൽഎക്കെതിരെ പ്രതിഷേധവുമായി ഡിവൈഎഫ്ഐയും യുവമോർച്ചയും രംഗത്തെത്തി.ഏറെ പണിപ്പെട്ടാണ് രാഹുലിനെ ആശുപത്രിയിൽ വൈദ്യപരിശോധനയ്ക്കായി എത്തിച്ചത്. ഇരുവിഭാഗങ്ങളും പ്രതിഷേധവുമായി പ്രദേശത്ത് നിലയുറപ്പിക്കുകയായിരുന്നു.
പത്തനംതിട്ടയ്ക്ക് പുറമെ പാലക്കാട് ബിജെപിയുടെ നേത്യത്വത്തിലും പ്രതിഷേധം ഉണ്ടായി. രാഹുലിൻ്റെ പാലക്കാട്ടെ എംഎൽഎ ഓഫീസിലേക്ക് ആണ് പ്രതിഷേധം നടന്നത്. എംഎൽഎ സ്ഥാനം രാജിവെക്കണം എന്നാവശ്യപ്പെട്ട് പ്രതിഷേധക്കാർ രാഹുലിൻ്റെ കോലം കത്തിച്ചു.
