ന്യൂഡൽഹി : കർണാടക നിയമസഭാ തിരഞ്ഞെടുപ്പിൽ നടന്നുവെന്ന് ആരോപിക്കപ്പെടുന്ന ക്രമക്കേടുകൾക്കുള്ള തെളിവ് സത്യവാങ്മൂലം സമർപ്പിക്കാൻ ലോക്സഭാ പ്രതിപക്ഷ നേതാവ് രാഹുൽ ഗാന്ധിയോട് കേന്ദ്ര തിരഞ്ഞെടുപ്പ് കമ്മീഷൻ വീണ്ടും ആവശ്യപ്പെട്ടു.
ഒന്നുകിൽ അദ്ദേഹം സത്യവാങ്മൂലം നൽകുകയോ, അല്ലെങ്കിൽ രാജ്യത്തോട് മാപ്പ് പറയുകയോ ചെയ്യണമെന്ന് തിരഞ്ഞെടുപ്പ് കമ്മീഷൻ വൃത്തങ്ങൾ അറിയിച്ചു. കർണാടകയിലെ ബാംഗ്ലൂർ സെൻട്രൽ ലോക്സഭാ മണ്ഡലത്തിലെ മഹാദേവപുര നിയമസഭാ സീറ്റിൽ ബി.ജെ.പിക്ക് വിജയം ഉറപ്പാക്കാൻ 1,00,250 “വ്യാജ വോട്ടുകൾ” സൃഷ്ടിക്കപ്പെട്ടുവെന്ന് രാഹുൽ പത്രസമ്മേളനത്തിൽ ആരോപിച്ചിരുന്നു.
ഇതിനിടെ, ബീഹാർ കരട് വോട്ടർ പട്ടികയിൽ നിന്ന് വോട്ടർമാരുടെ പേരുകൾ നീക്കം ചെയ്യുന്നത് മുൻകൂട്ടി അറിയിപ്പ് നൽകിയ ശേഷം മാത്രമായിരിക്കുമെന്ന് തിരഞ്ഞെടുപ്പ് കമ്മീഷൻ സുപ്രീം കോടതിക്ക് ഉറപ്പ് നൽകി.
അന്തിമ വോട്ടർ പട്ടികയിൽ നിന്ന് ഒഴിവാക്കപ്പെടുന്നത് ഒഴിവാക്കാൻ, വിവിധ സർക്കാർ വകുപ്പുകളിൽ നിന്ന് ആവശ്യമായ രേഖകൾ ലഭ്യമാക്കാൻ യോഗ്യരായ വോട്ടർമാരെ സഹായിക്കുന്നതിനായി 2.5 ലക്ഷം സന്നദ്ധപ്രവർത്തകരെ, കൂടുതലും ബീഹാർ സർക്കാർ ഉദ്യോഗസ്ഥരെ, വിന്യസിച്ചിട്ടുണ്ടെന്ന് കമ്മീഷൻ അറിയിച്ചു.
