ന്യൂഡല്ഹി: പ്രതിരോധ മേഖലയ്ക്ക് 50,000 കോടി രൂപ നീക്കിവെക്കാന് സര്ക്കാര് തീരുമാനിച്ചതായി റിപ്പോര്ട്ട്. ഓപ്പറേഷന് സിന്ദൂറിൻ്റെ വിജയത്തിന് പിന്നാലെ അധിക ബജറ്റ് വിഹിതമായി ഈ തുക അനുവദിക്കുക.
പാര്ലമെന്റിന്റെ ശീതകാല സമ്മേളനത്തില് ഇതിന് അംഗീകാരം ലഭിക്കുമെന്നാണ് സൂചന.പുതിയ ആയുധങ്ങളും സാങ്കേതിക വിദ്യകളും സ്വന്തമാക്കുന്നതിന്റെ ഭാഗമായാണ് നീക്കം.
ഫെബ്രുവരി ഒന്നിന് ധനമന്ത്രി നിര്മല സീതാരാമന് അവതരിപ്പിച്ച ബജറ്റില് പ്രതിരോധമേഖലയ്ക്കായി നീക്കിവെച്ചത് 6.81 ലക്ഷം കോടിരൂപയാണ്. അതിന് മുന്വര്ഷത്തെ ബജറ്റില് ഇത് 6.2 ലക്ഷം കോടിയായിരുന്നു. ഒന്പത് ശതമാനമാണ് വര്ധന.
നരേന്ദ്രമോദിയുടെ നേതൃത്വത്തിലുള്ള എന്ഡിഎ സര്ക്കാര് അധികാരമേറ്റ ശേഷം കഴിഞ്ഞ പത്തുവര്ഷത്തിനിടെ പ്രതിരോധ ബജറ്റ് ഏകദേശം മൂന്നിരട്ടിയായി വര്ധിച്ചു. 2014-15 ബജറ്റില് ഇത് 2.29 ലക്ഷം കോടിയായിരുന്നു.
ഏപ്രില് 22ന് കശ്മീരിലെ പഹല്ഗാമില് 26 പേരെ വെടിവച്ചുകൊന്ന ഭീകരാക്രമണത്തിന് നല്കിയ തിരിച്ചടി ഇന്ത്യന് പ്രതിരോധ സേനയുടെ മികവ് തെളിയിക്കുന്നതായിരുന്നു. പാകിസ്ഥാന്റെ ഒന്പത് ഭീകരകേന്ദ്രങ്ങള് തകര്ത്ത സേന നൂറിലധികം ഭീകരെ കൊലപ്പെടുത്തുകയും ചെയ്തു. അതിന് മറുപടിയായി പാക് സൈന്യം നടത്തിയ ആക്രമണങ്ങളെ പ്രതിരോധിക്കുകയം ചെയ്തു.
