കാഠ്മണ്ഡു: സർക്കാരിനെ വീഴ്ത്തിയ കലാപം ജയിലുകളിലേക്കും വ്യാപിച്ചതോടെ നേപ്പാളിൽ 1500-ലേറെ തടവുകാര് ജയില്ചാടി. മുന്മന്ത്രി സഞ്ജയ് കുമാര് സാഹ്, രാഷ്ട്രീയ സ്വതന്ത്ര പാര്ട്ടി പ്രസിഡന്റ് റാബി ലാമിച്ഛാനെ തുടങ്ങിയവരും ജയിലില്നിന്ന് രക്ഷപ്പെട്ടവരില് ഉള്പ്പെടുന്നു.
ലളിത്പുരിലെ നാഖു ജയിലിലേക്കാണ് കഴിഞ്ഞദിവസം പ്രക്ഷോഭകാരികള് ഇരച്ചെത്തിയത്. ജയില്വളപ്പിനുള്ളില് കയറിയ നൂറുക്കണക്കിന് പ്രക്ഷോഭകാരികള് ജയിലിനുള്ളിലും അക്രമം അഴിച്ചുവിട്ടു.
സെല്ലുകള് തകര്ത്ത് തടവുകാരെ പുറത്തുവിടുകയായിരുന്നു. മറ്റുചില തടവുകാര് സ്വയം സെല്ലുകള് തകര്ത്ത് പുറത്തിറങ്ങി.ജയിലുകളിലെ രേഖകൾ തീയിട്ട് നശിപ്പിച്ചു.പോലീസും ജയില് അധികൃതരും ഇടപെട്ടില്ല.
മുന് മന്ത്രി സഞ്ജയ് കുമാര് സാഹ് കഴിഞ്ഞ 13 വര്ഷമായി തടവുശിക്ഷ അനുഭവിക്കുകയാണ്. 2012-ലെ ഒരു ബോംബ് സ്ഫോടനക്കേസിലാണ് ഇദ്ദേഹത്തെ ജീവപര്യന്തം തടവിന് ശിക്ഷിച്ചിരുന്നത്.അഞ്ചുപേര് കൊല്ലപ്പെട്ട സ്ഫോടനത്തിന്റെ മുഖ്യസൂത്രധാരന് സഞ്ജയ് കുമാര് ആണെന്നായിരുന്നു കോടതിയുടെ കണ്ടെത്തല്.
ഇതിനുപുറമേ റേഡിയോ ടുഡേയുടെ ഉടമയായ അരുണ് സിംഘാനിയയെ കൊലപ്പെടുത്തിയ കേസിലും പ്രതിയാണ്. അതേസമയം, താന് നിരപരാധിയാണെന്നായിരുന്നു ജയില്ചാടിയ ശേഷം സഞ്ജയ് കുമാറിന്റെ അവകാശവാദം. പ്രക്ഷോഭത്തെ അദ്ദേഹം അഭിനന്ദിക്കുകയുംചെയ്തു.
പ്രമുഖ രാഷ്ട്രീയനേതാവായ റാബി ലാമിച്ഛാനെയാണ് ജയിലില്നിന്ന് പുറത്തിറങ്ങിയ മറ്റൊരാള്. സഹകരണ ഫണ്ട് തട്ടിപ്പ് കേസിലാണ് ഇദ്ദേഹം
ജയിലിലായത്.
കലാപത്തിനിടെ കൊള്ളയും റിപ്പോര്ട്ട് ചെയ്തിട്ടുണ്ട്. പലയിടങ്ങളിലും വ്യാപകമായി വ്യാപാരസ്ഥാപനങ്ങളും ബാങ്കും ചിലര് കൊള്ളയടിച്ചു.
രാഷ്ട്രീയബഞ്ജിയ ബാങ്കിന്റെ ബനേശ്വര് ബ്രാഞ്ച് കൊള്ള ചെയ്തു. കവര്ച്ച നടത്തിയതിന് 26 പേരെ സൈന്യം അറസ്റ്റ് ചെയ്തതായും റിപ്പോര്ട്ടുകളുണ്ട്.
