ന്യൂഡല്ഹി: ജവാഹര്ലാല് നെഹ്രു 1937-ല് സ്ഥാപിച്ച, നാഷണല് ഹെറാള്ഡ് പത്രത്തിൻ്റെ കേസുമായി ബന്ധപ്പെട്ട് 700 കോടി രൂപയുടെ സ്വത്തുക്കള് കണ്ടുകെട്ടാനുള്ള നടപടികള് ആരംഭിച്ച് എന്ഫോഴ്സ്മെന്റ് ഡയറക്ടറേറ്റ്(ഇ.ഡി).
നാഷണല് ഹെറാള്ഡിന്റെ ഉടമകളായ അസോസിയേറ്റഡ് ജേണല്സ് ലിമിറ്റഡിന്റെ (എ.ജെ.എല്) സ്വത്താണ് കണ്ടുകെട്ടുന്നത്. കോണ്ഗ്രസ് മുൻ അധ്യക്ഷ സോണിയ ഗാന്ധി,പ്രതിപക്ഷ നേതാവ് രാഹുല് ഗാന്ധി എന്നിവരാണ് കേസിലെ പ്രധാന എതിർകക്ഷികൾ.
ലക്നൗ, മുംബൈ, ഡല്ഹി എന്നിവിടങ്ങളിലെ വസ്തുവകകള്ക്ക് പുറമേ ഡല്ഹി ബഹാദൂര് ഷാ സഫര് മാര്ഗിലെ ഹെറാള്ഡ് ഹൗസും കണ്ടുകെട്ടും. കള്ളപ്പണം വെളുപ്പിക്കല് നിരോധന നിയമത്തിലെ വിവിധ വകുപ്പുകള് പ്രകാരമാണ് നടപടി.
അസോസിയേറ്റഡ് ജേണല്സ് ലിമിറ്റഡിനെ പുതുതായുണ്ടാക്കിയ യങ് ഇന്ത്യന് കമ്പനി ഏറ്റെടുത്തതില് അഴിമതിയും വഞ്ചനയുമുണ്ടെന്ന് ആരോപിച്ച് 2012-ല് ബിജെപി നേതാവും മുൻ കേന്ദ്രമന്ത്രിയുമായ ഡോ.
സുബ്രഹ്മണ്യന് സ്വാമി രംഗത്ത് വന്നതാണ് കേസിന്റെ തുടക്കം.
5000 സ്വാതന്ത്ര്യസമര സേനാനികള്ക്ക് ഓഹരിയുണ്ടായിരുന്ന ആയിരക്കണക്കിന് കോടിയുടെ ഭൂസ്വത്തുള്ള എ.ജെ.എല്. കമ്പനിയെ യങ് ഇന്ത്യന് എന്നൊരു ഉപായക്കമ്പനിയുണ്ടാക്കി തട്ടിയെടുത്തുവെന്നാണ് സ്വാമി ആരോപിക്കുന്നത്.1,600 കോടി രൂപ മതിക്കുന്ന ഡല്ഹിയിലെ ഹെറാള്ഡ് ഹൗസ് വെറും 50 ലക്ഷം രൂപയ്ക്കാണ് ഇവര് സ്വന്തമാക്കിയെതെന്നും അദ്ദേഹം ആരോപിച്ചിരുന്നു.
സുബ്രഹ്മണ്യന് സ്വാമി
അസ്സോസ്സിയേറ്റഡ് ജേണല്സ് ലിമിറ്റഡ് ഏറ്റെടുക്കാന് യങ് ഇന്ത്യന് കമ്പനിക്ക് ഇന്ത്യന് നാഷണല് കോണ്ഗ്രസ് 90 കോടി രൂപ വായ്പ അനുവദിച്ചുവെന്നും ഇത് ചട്ടവിരുദ്ധമാണെന്നും സ്വാമി പറയുന്നു.രാജ്യത്തെ ഒരു രാഷ്ട്രീയപാര്ട്ടിക്കും വാണിജ്യാവശ്യങ്ങള്ക്കു വേണ്ടി വായ്പ നല്കാന് നിയമം അനുവദിക്കുന്നില്ല. അസ്സോസ്സിയേറ്റഡ് പ്രസ്സ് ഏറ്റെടുക്കാന് മാത്രമാണീ വായ്പ എന്നും ഇതിനു പുറകില് വാണിജ്യ താല്പര്യങ്ങളില്ലെന്നുമാണ് കോണ്ഗ്രസ് ഇതിനോട് പ്രതികരിച്ചത്.
