ക്ഷത്രിയൻ .
ബിജെപിക്ക് കുത്തുന്ന ഓരോ വോട്ടും കേരളത്തനിമ തകർക്കുമെന്ന അഭിപ്രായമാണ് കാരണഭൂതന്. ബലേഭേഷ്! കാവിപ്പാർട്ടിക്ക് വോട്ടൊന്നും കുത്താതെ തന്നെ കേരളത്തനിമ തകർക്കുന്നതിൽ ഏർപ്പെട്ട സർക്കാരിൻ്റെ കപ്പിത്താനാണ് കാരണഭൂതനെന്നും ഓർക്കണം.
കേരളത്തനിമ മണിച്ചിത്രത്താഴിട്ട് പൂട്ടിയ പെട്ടിക്കകത്ത് ഭദ്രമായി നിലനിൽക്കുകയാണെന്ന് തോന്നും മുഖ്യൻ്റെ മുന്നറിയിപ്പ് കേട്ടാൽ. കണ്ണൂരിൽ ചെങ്കൊടിക്കാരുടെ ജില്ലാ ഓഫീസ് ഉദ്ഘാടനം ചെയ്തുകൊണ്ടാണ് ആശാൻ കാവിപ്പാർട്ടിയെക്കുറിച്ച് മുന്നറിയിപ്പ് നൽകിയത്.
അതിൻ്റെ തൊട്ടുതലേന്നാണ് പി എം ശ്രീയിൽ ഒപ്പുവക്കുമെന്ന് ശിവൻ കുട്ടിയണ്ണൻ പ്രഖ്യാപിച്ചത്. കോടികൾ കിട്ടാനുള്ള വകുപ്പുണ്ടെന്നതിനാലാണ് ഒപ്പുവെക്കലെന്നാണ് അണ്ണൻ പറഞ്ഞിട്ടുള്ളത്. കാശ് തടയുമെന്നായാൽ എവിടെയും ഒപ്പുവെക്കുമെന്ന ധ്വനിയുമുണ്ട് അണ്ണൻ്റെ പ്രഖ്യാപനത്തിൽ.
അങ്ങനെയങ്ങ് ഒപ്പുവച്ചാൽ കാവിപ്പാർട്ടിയുടെ ചരിത്രനിർമിതിയിൽ കേരളവും അറിയാതെ അലിഞ്ഞുചേരേണ്ടിവരുമെന്ന് ഇടതുമുന്നണിയിലെ ചെറിയേട്ടന് ഭയമുണ്ട്. മുന്നണിയിലും മന്ത്രിസഭയിലും കാണിച്ചുതരാമെന്നൊക്കെ വിശ്വം കണ്ട ബിനോയ് ഭീഷണിപ്പെടുത്തുന്നുവെങ്കിലും വലിയേട്ടനെ തിരുത്തിയ ചരിത്രമൊന്നും ചെറിയേട്ടൻ വക ഇക്കാലത്തിനിടയിൽ കേരളത്തിൽ സംഭവിച്ചിട്ടില്ല.
കാശ് ലഭിച്ചില്ലെങ്കിൽ വേണ്ട, അപനിർമിതിയിൽ പങ്കാളികളാകാൻ ഇല്ലെന്ന് തീരുമാനിച്ച തമിഴ്നാട്ടിലെ സ്റ്റാലിനും പശ്ചിമ ബംഗാളിലെ ദീദിക്കും ഒറ്റച്ചങ്കേയുള്ളൂവെന്നതും ചരിത്രം. എന്നാൽ ഇരട്ടച്ചങ്കുള്ള കേരള മുഖ്യനെന്തേ പി.എം.ശ്രീയുടെ പിന്നാലെ പോയി എന്നത് ഭാവിചരിത്രകാരന്മാരെങ്കിലും പഠനവിഷയമാക്കിയേക്കാം.
പാവം സിപിഐ എന്നല്ലാതെന്ത് പറയാൻ. ശ്രീയെന്ന് കേട്ടാൽ തന്നെ അഭിമാനപൂരിതമാകുന്ന അന്തരംഗമാണ് കാരണഭൂതൻ്റേത്. ശ്രീ എം എന്നൊരു വിദ്വാനെ വിളിച്ചുവരുത്തി അനന്തപുരിയിൽ ലക്ഷങ്ങൾ മതിക്കുന്ന ഭൂമി സമ്മാനിച്ചതൊക്കെ ഓർമയുള്ളതല്ലേ. ചെങ്കൊടി പാർടിയും കാവിപ്പാർട്ടിയും തമ്മിൽ സമാധാന ചർച്ച നടന്നത് മൂപ്പരുടെ മേശയ്ക്ക് ചുററുമിരുന്നാണെന്ന് കരക്കമ്പിയൂണ്ട്. മൂവരും അത് പരസ്യമായി നിഷേധിച്ചതായി വിവരമില്ല. അതുകൊണ്ട് അതിൽ ശരിയുണ്ടാവാം. ശരികേടുകൾക്കിടയിലും ഒരു ശരി.
അങ്ങനെ ശ്രീയോട് താദാത്മ്യം പ്രാപിച്ച മാന്യദേഹം നേതൃത്വം നൽകുന്ന സർക്കാർ കേരളത്തനിമയെന്നല്ല കേരളം തന്നെ ഇല്ലാതായാലും പി എം ശ്രീയിൽ പങ്കാളികളാകുമെന്ന് വിശ്വസിക്കാനുള്ള ബുദ്ധി ബിനോയ് വിശ്വത്തിന് ഇല്ലാതെപോയല്ലോ എന്നതിൽ സങ്കടപ്പെടുകയേ വഴിയുള്ളൂ. പിന്നെ ചെങ്കൊടി പാർടിയുടെ അഖിലേന്ത്യൻ ബേബി സഖാവ് എന്തോ പ്രസ്താവിച്ചിട്ടുണ്ട്. പറഞ്ഞത് എന്താണെന്ന് മാലോകർക്ക് മനസ്സിലായിട്ടില്ല. ഇനിയും വിശദീകരിക്കാൻ സമയമുണ്ടല്ലോ.. വരട്ടെ.. നോക്കാം.. ചർച്ച ചെയ്യാം….
