ബീജിംഗ്: വൈദ്യശാസ്ത്രരംഗത്ത് വിപ്ലവം സൃഷ്ടിച്ചുകൊണ്ട്, കേവലം 2-3 മിനിറ്റിനുള്ളിൽ ഒടിഞ്ഞ എല്ലുകൾ കൂട്ടിച്ചേർക്കാൻ ശേഷിയുള്ള ഒരു ‘അസ്ഥിപ്പശ’ ചൈനയിലെ ശാസ്ത്രജ്ഞർ വികസിപ്പിച്ചെടുത്തു.
ഈ കണ്ടുപിടുത്തം അടിയന്തര ചികിത്സാരംഗത്തും, ഓർത്തോപീഡിക് ചികിത്സാരീതികളിലും സമൂലമായ മാറ്റങ്ങൾക്ക് വഴിയൊരുക്കുമെന്നാണ് വിലയിരുത്തപ്പെടുന്നത്.
നിലവിൽ, ഒരു ഒടിഞ്ഞ എല്ല് പൂർവസ്ഥിതിയിലാകാൻ ആഴ്ചകളോ മാസങ്ങളോ വേണ്ടിവരും.എന്നാൽ പുതിയ ദ്രാവകത്തിന്റെ സഹായത്തോടെ വളരെ കുറഞ്ഞ സമയം കൊണ്ട് രോഗികളെ സുഖപ്പെടുത്താൻ കഴിയും. ഇത് വഴി ചികിത്സാ ചിലവുകൾ ഗണ്യമായി കുറയ്ക്കാനും, രോഗികൾക്ക് വേഗത്തിൽ സാധാരണ ജീവിതത്തിലേക്ക് മടങ്ങിയെത്താനും സാധിക്കും.
കിഴക്കൻ ചൈനയിലെ ഷെജിയാങ് പ്രവിശ്യയിലെ ഒരു ഗവേഷണ സംഘമാണ് ഈ വിപ്ലവകരമായ ‘അസ്ഥിപ്പശ’ വികസിപ്പിച്ചത്. ‘ബോൺ 02’എന്ന് പേരിട്ടിരിക്കുന്ന ഈ മെഡിക്കൽ അഡ്ഹെസീവ്, കക്കയിറച്ചികളുടെ ശക്തമായ ഒട്ടാനുള്ള കഴിവുകളിൽ നിന്ന് പ്രചോദനം ഉൾക്കൊണ്ടാണ് നിർമ്മിച്ചിട്ടുള്ളത്. സർ റൺ റൺ ഷാ ഹോസ്പിറ്റലിലെ ഓർത്തോപീഡിക് സർജനായ ഡോ. ലിൻ സിയാൻഫെങ്ങിൻ്റെ നേതൃത്വത്തിലുള്ള സംഘമാണ് ഇതിനുപിന്നിൽ പ്രവർത്തിച്ചത്.
രക്തം നിറഞ്ഞ അന്തരീക്ഷത്തിൽ പോലും ഒടിഞ്ഞ എല്ലിന്റെ ഭാഗങ്ങൾ അതിവേഗം കൂട്ടിച്ചേർക്കാൻ ഈ ദ്രാവകത്തിന് സാധിക്കുമെന്ന് ഗവേഷകർ പറയുന്നു. പരമ്പരാഗതമായ മെറ്റൽ ഇംപ്ലാൻ്റുകൾക്ക് പകരം ഇത് ഉപയോഗിക്കാം.
‘ബോൺ 02’ ഉപയോഗിച്ച് ഒടിഞ്ഞ എല്ലിന്റെ ഭാഗത്ത് ഒരു സ്പ്രേ പോലെ പ്രയോഗിക്കുമ്പോൾ, അത് എല്ലിന്റെ കോശങ്ങളെ ഉത്തേജിപ്പിക്കുകയും, ഒടിഞ്ഞ ഭാഗങ്ങൾ അതിവേഗം കൂട്ടിച്ചേർക്കുകയും ചെയ്യുന്നു. ഏറ്റവും വലിയ പ്രത്യേകത, ഇത് പൂർണ്ണമായും ജൈവവസ്തുക്കൾ ഉപയോഗിച്ച് നിർമ്മിച്ചതാണ് എന്നതാണ്. അതിനാൽ, എല്ല് സുഖപ്പെടുന്നതിനനുസരിച്ച് ഈ പശ ശരീരം സ്വയം ആഗിരണം ചെയ്തുകൊള്ളും. അത് നീക്കം ചെയ്യാൻ വീണ്ടും ഒരു ശസ്ത്രക്രിയയുടെ ആവശ്യമില്ല.
150-ൽ അധികം രോഗികളിൽ നടത്തിയ പരീക്ഷണങ്ങൾ വിജയകരമാണെന്ന് ഗവേഷകർ അവകാശപ്പെടുന്നു. പരമ്പരാഗതമായി സ്റ്റീൽ പ്ലേറ്റുകളും സ്ക്രൂകളും ഉപയോഗിച്ച് ചെയ്യുന്ന ശസ്ത്രക്രിയകൾ ഈ പുതിയ പശ ഉപയോഗിച്ച് 180 സെക്കൻഡിനുള്ളിൽ പൂർത്തിയാക്കാൻ കഴിഞ്ഞതായും അവർ പറയുന്നു.
ഈ കണ്ടുപിടുത്തം ഉണ്ടാക്കുന്ന മാറ്റങ്ങൾ നിരവധിയാണ്.രോഗികൾക്ക് ആശുപത്രിയിൽ ചിലവഴിക്കേണ്ട സമയം ഗണ്യമായി കുറയും. രണ്ടാമതൊരു ശസ്ത്രക്രിയയുടെ ആവശ്യം ഇല്ലാത്തതുകൊണ്ട് രോഗിയുടെ ബുദ്ധിമുട്ടുകൾ കുറയും. മെറ്റൽ ഇംപ്ലാന്റുകൾ ഉപയോഗിക്കുമ്പോൾ ഉണ്ടാകാൻ സാധ്യതയുള്ള അണുബാധകൾ ഒഴിവാക്കാൻ സാധിക്കും.
