കൊൽക്കത്ത: വോട്ടർ പട്ടികയിലെ ക്രമക്കേടുകൾ പരിശോധിക്കുന്നതിനായി തിരഞ്ഞെടുപ്പ് കമ്മീഷൻ നടത്തുന്ന പ്രത്യേക പരിശോധനാ നടപടികൾ പശ്ചിമ ബംഗാളിൽ ശക്തമാക്കിയതോടെ അനധികൃത കുടിയേറ്റക്കാർക്കിടയിൽ പരിഭ്രാന്തി.
പിടിക്കപ്പെടുമെന്നും ജയിലിലാകുമെന്നും ഭയന്ന് നൂറുകണക്കിന് ബംഗ്ലാദേശി കുടുംബങ്ങളാണ് തിരികെ സ്വന്തം നാട്ടിലേക്ക് കടക്കാൻ അതിർത്തികളിൽ തടിച്ചുകൂടുന്നത്.
വ്യാജ രേഖകൾ ഉപയോഗിച്ച് വർഷങ്ങളായി താമസിച്ചുവരുന്നവരാണ് ഇപ്പോൾ കൂട്ടത്തോടെ രാജ്യം വിടാൻ ശ്രമിക്കുന്നത്.ഇക്കഴിഞ്ഞ ദിവസങ്ങളിൽ പശ്ചിമ ബംഗാളിലെ നോർത്ത് 24 പർഗാന ജില്ലയിലെ അതിർത്തി മേഖലകളിൽ ബി.എസ്.എഫ് നൂറുകണക്കിന് ആളുകളെയാണ് പിടികൂടിയത്.
വോട്ടർ പട്ടിക ശുദ്ധീകരിക്കുന്നതിനായി നടത്തുന്ന പ്രത്യേക പരിശോധന പൗരത്വ രജിസ്റ്റർ നടപ്പിലാക്കുന്നതിന്റെ മുന്നോടിയാണെന്ന അഭ്യൂഹം കുടിയേറ്റക്കാർക്കിടയിൽ ശക്തമാണ്. വോട്ടർ പട്ടികയിൽ നിന്ന് പേര് വെട്ടുന്നതോടുകൂടി തങ്ങൾ അനധികൃത കുടിയേറ്റക്കാരായി മുദ്രകുത്തപ്പെടുമെന്നും, തുടർന്ന് അറസ്റ്റിലാവുകയോ ഡിറ്റൻഷൻ സെന്ററുകളിലേക്ക് മാറ്റപ്പെടുകയോ ചെയ്യുമെന്ന് ഇവർ ഭയക്കുന്നു.
അതിർത്തിയിൽ ബി.എസ്.എഫിൻ്റെ പിടിയിലായവരിൽ ഭൂരിഭാഗം പേരുടെയും കൈവശം ഇന്ത്യക്കാരാണെന്ന് തെളിയിക്കുന്ന ആധാർ കാർഡ്, വോട്ടർ ഐഡി, പാൻ കാർഡ് എന്നിവയുണ്ട്. എന്നാൽ ചോദ്യം ചെയ്യലിൽ ഇവ വ്യാജമായി നിർമ്മിച്ചതാണെന്നും തങ്ങൾ ബംഗ്ലാദേശി പൗരന്മാരാണെന്നും ഇവർ സമ്മതിക്കുന്നുണ്ട്.
പ്രാദേശിക ഏജന്റുമാർക്ക് പണം നൽകിയാണ് ഇവർ ഇത്തരം രേഖകൾ സംഘടിപ്പിച്ചത്. കൊൽക്കത്ത, മധ്യഗ്രാം, സാൾട്ട് ലേക്ക് തുടങ്ങിയ നഗരപ്രദേശങ്ങളിൽ വീട്ടുജോലിക്കാരായും നിർമ്മാണ തൊഴിലാളികളായും വർഷങ്ങളായി ജോലി ചെയ്തു വരികയായിരുന്നു ഇവർ.
ബംഗ്ലാദേശ് അതിർത്തിയിലുള്ള ഹക്കിംപൂർ ചെക്ക് പോസ്റ്റിന് സമീപം സ്ത്രീകളും കുട്ടികളും അടങ്ങുന്ന വലിയ സംഘങ്ങൾ മടങ്ങാൻ അവസരം കാത്തുനിൽക്കുന്നതായി റിപ്പോർട്ടുകൾ സൂചിപ്പിക്കുന്നു. അനധികൃതമായി ഇന്ത്യയിലേക്ക് കടന്നുവന്നതുപോലെ തന്നെ, അനധികൃതമായി തിരികെ പോകാനാണ് ഇവർ ശ്രമിക്കുന്നത്. എന്നാൽ അതിർത്തി സുരക്ഷാ സേന ഇവരെ തടയുകയും തുടർനടപടികൾക്കായി പോലീസിന് കൈമാറുകയുമാണ് ചെയ്യുന്നത്.
സാധാരണയായി ബംഗ്ലാദേശിൽ നിന്ന് ഇന്ത്യയിലേക്ക് നുഴഞ്ഞുകയറുന്ന വാർത്തകളാണ് കേൾക്കാറുള്ളതെങ്കിൽ, ഇപ്പോൾ ‘തിരിച്ചു പോക്ക്’ ആണ് അതിർത്തിയിൽ ദൃശ്യമാകുന്നത്. അനധികൃത കുടിയേറ്റം തടയുന്നതിൽ ബി.എസ്.എഫും പ്രാദേശിക ഭരണകൂടവും കർശന നിലപാട് സ്വീകരിച്ചതും ഈ പലായനത്തിന് കാരണമായിട്ടുണ്ട്.
വോട്ടർ പട്ടികയിലെ കൃത്യത ഉറപ്പുവരുത്താനുള്ള സാധാരണ നടപടിക്രമം മാത്രമാണ് ഈ നടപടികളെങ്കിലും അനധികൃതമായി തങ്ങുന്നവർക്കിടയിൽ ഇത് വലിയ പ്രത്യാഘാതമാണ് സൃഷ്ടിച്ചിരിക്കുന്നത്. ഇന്ത്യയിൽ അനധികൃതമായി സമ്പാദിച്ച രേഖകൾ ഇനി സുരക്ഷ നൽകില്ലെന്ന തിരിച്ചറിവാണ് ഇവരെ തിരികെപ്പോക്കിന് പ്രേരിപ്പിക്കുന്നത്.
പശ്ചിമ ബംഗാളിൽ നിയമസഭാ തിരഞ്ഞെടുപ്പ് അടുത്തുവരവെ, ഈ പരിശോധന മുഖ്യമന്ത്രി മമത ബാനർജിക്കും തൃണമൂൽ കോൺഗ്രസിനും വലിയൊരു രാഷ്ട്രീയ വെല്ലുവിളിയായി മാറുകയാണ്.ഈ വിഷയം മമത ബാനർജിയെ പ്രധാനമായും രണ്ട് രീതിയിലാണ് ബാധിക്കാൻ സാധ്യതയുള്ളത്:
ബി.ജെ.പി ഉന്നയിക്കുന്ന പ്രധാന ആരോപണം, മമത ബാനർജി അനധികൃത ബംഗ്ലാദേശി കുടിയേറ്റക്കാരെ തന്റെ “വോട്ട് ബാങ്ക്” ആയി ഉപയോഗിക്കുന്നു എന്നതാണ്. വോട്ടർ പട്ടികയിൽ നിന്ന് അനധികൃതരെ നീക്കം ചെയ്യുന്നത് തൃണമൂലിൻ്റെ വോട്ട് വിഹിതത്തെ ബാധിക്കുമെന്ന് ബി.ജെ.പി കരുതുന്നു. 13 ലക്ഷത്തോളം വ്യാജ വോട്ടർമാർ പട്ടികയിലുണ്ടെന്നാണ് പ്രതിപക്ഷ നേതാവ് സുവേന്ദു അധികാരി ആരോപിക്കുന്നത്. ഇവ നീക്കം ചെയ്യപ്പെട്ടാൽ പല മണ്ഡലങ്ങളിലും ഫലം മാറിമറിഞ്ഞേക്കാം.
മമത ബാനർജി ഇതിനെ കാണുന്നത് മറ്റൊരു രീതിയിലാണ്.തിരഞ്ഞെടുപ്പ് കമ്മീഷൻ നടപടികളെ “അപ്രഖ്യാപിത പൗരത്വ രജിസ്റ്റർ’ എന്നാണ് അവർ വിശേഷിപ്പിക്കുന്നത്. യഥാർത്ഥ ഇന്ത്യൻ പൗരന്മാരെ (പ്രത്യേകിച്ച് ന്യൂനപക്ഷങ്ങളെ) പട്ടികയിൽ നിന്ന് ഒഴിവാക്കാനുള്ള നീക്കമാണിതെന്ന് അവർ ആരോപിക്കുന്നു. ഈ ഭയം നിലനിർത്തി ന്യൂനപക്ഷ വോട്ടുകൾ ഏകീകരിക്കാൻ മമതയ്ക്ക് സാധിച്ചേക്കാം. എന്നാൽ, അതിർത്തി ജില്ലകളിൽ ഹിന്ദു വോട്ടുകൾ ബി.ജെ.പിയിലേക്ക് ഒഴുകാനും ഇത് കാരണമായേക്കാം.
അനധികൃത കുടിയേറ്റമായതിനാൽ കൃത്യമായ കണക്കുകൾ ലഭ്യമല്ലെങ്കിലും, കേന്ദ്ര-സംസ്ഥാന സർക്കാരുകളുടെ വിവിധ റിപ്പോർട്ടുകൾ പ്രകാരം ഏകദേശ കണക്കുകൾ ലഭ്യമാണ്.
2016-ൽ കേന്ദ്ര ആഭ്യന്തര സഹമന്ത്രി കിരൺ റിജിജു രാജ്യസഭയിൽ നൽകിയ മറുപടി പ്രകാരം ഇന്ത്യയിൽ ഏകദേശം 2 കോടി അനധികൃത ബംഗ്ലാദേശി കുടിയേറ്റക്കാരുണ്ടെന്ന് വ്യക്തമാക്കിയിരുന്നു. 2004-ലെ കണക്കുകൾ പ്രകാരം പശ്ചിമ ബംഗാളിൽ മാത്രം ഏകദേശം 57 ലക്ഷം അനധികൃത കുടിയേറ്റക്കാരുണ്ടെന്നായിരുന്നു നിഗമനം. കഴിഞ്ഞ 20 വർഷത്തിനിടയിൽ ഈ സംഖ്യ ഗണ്യമായി വർദ്ധിച്ചിട്ടുണ്ടാകാം.
പശ്ചിമ ബംഗാളിലെ വോട്ടർ പട്ടികയിൽ നിലവിൽ 1 കോടിയിലധികം വ്യാജ വോട്ടർമാരോ അനധികൃത കുടിയേറ്റക്കാരോ കടന്നുകൂടിയിട്ടുണ്ടെന്നാണ് ബി.ജെ.പി നേതാക്കൾ അവകാശപ്പെടുന്നത്.
ബി.എസ്.എഫ് പുറത്തുവിട്ട സമീപകാല കണക്കുകൾ പ്രകാരം, അനധികൃതമായി അതിർത്തി കടക്കാൻ ശ്രമിക്കുന്നവരുടെ എണ്ണത്തിൽ വലിയ വർദ്ധനവുണ്ട്. കഴിഞ്ഞ 3 വർഷത്തിനിടയിൽ മാത്രം 2,600-ലധികം പേരെ അതിർത്തിയിൽ വെച്ച് പിടികൂടിയിട്ടുണ്ട്. എന്നാൽ പിടിക്കപ്പെടാതെ കടന്നുവന്നവരുടെ എണ്ണം ഇതിലും എത്രയോ അധികമായിരിക്കും.
ഈ വിഷയം അടുത്ത തിരഞ്ഞെടുപ്പിൽ ഒരു പ്രധാന പ്രചാരണായുധമാകും. വ്യാജ വോട്ടർമാരെ നീക്കം ചെയ്യുന്നത് തിരഞ്ഞെടുപ്പ് സുതാര്യമാക്കുമെന്ന് ബി.ജെ.പി വാദിക്കുമ്പോൾ, ഇത് സാധാരണക്കാരെ ഉപദ്രവിക്കാനുള്ള നീക്കമാണെന്ന് മമത ബാനർജി വാദിക്കുന്നു. അതിർത്തിയിലെ ഈ തിരിച്ചുപോക്ക് മമതയുടെ വോട്ട് ബാങ്കിന് വിള്ളലുണ്ടാക്കുമോ അതോ ന്യൂനപക്ഷങ്ങളെ കൂടുതൽ അവരോട് അടുപ്പിക്കുമോ എന്ന് കണ്ടറിയണം.
