തിരുവനന്തപുരം: കാമുകന് ഷാരോണിനെ കഷായത്തില് വിഷം കലര്ത്തി നല്കി കൊലപ്പെടുത്തിയ കേസിലെ പ്രതി ഗ്രീഷ്മ കുറ്റക്കാരിയെന്ന് നെയ്യാറ്റിന്കര അഡീഷണല് സെഷന്സ് കോടതി വിധിച്ചു.
പാറശാലയില് 2022 ഒക്ടോബര് 14ന് ആണ് കേസിനാസ്പദമായ സംഭവം നടന്നത്.കൊലപാതകം, വിഷം നല്കല്, തട്ടിക്കൊണ്ടുപോകല്, പൊലീസിനെ തെറ്റിദ്ധരിപ്പിക്കല് തുടങ്ങി ഗ്രീഷ്മയ്ക്കെതിരെ ചുമത്തിയ കുറ്റങ്ങള് തെളിഞ്ഞു.
തെളിവുകളുടെ അഭാവത്തിൽ രണ്ടാംപ്രതിയായ ഗ്രീഷ്മയുടെ അമ്മ സിന്ധുവിനെ വെറുതെ വിട്ടു.തെളിവു നശിപ്പിക്കാന് സഹായിച്ച ഗ്രീഷ്മയുടെ അമ്മാവന് നിര്മ്മല് കുമാര് നായരും കുറ്റക്കാരനാണെന്ന് കോടതി കണ്ടെത്തി. പ്രതികളുടെ ശിക്ഷ നാളെ വിധിക്കും.
നെയ്യാറ്റിന്കര അഡീഷണല് സെഷന്സ് കോടതി ജഡ്ജി എ എം ബഷീര് ആണ് വിധി പ്രസ്താവിച്ചത്. മറ്റൊരാളെ വിവാഹം കഴിക്കാനായി, കാമുകിയായ ഗ്രീഷ്മ കഷായത്തില് വിഷം കലര്ത്തി സുഹൃത്തായ ഷാരോണിനെ കൊലപ്പെടുത്തിയെന്നാണ് കേസ്.
വര്ഷങ്ങളായി ഷാരോണും ഗ്രീഷ്മയും അടുപ്പത്തിലായിരുന്നു. ഒരു സൈനികനുമായി വിവാഹം നിശ്ചയിച്ചതോടെ, ഷാരോണിനെ ഒഴിവാക്കാന് വേണ്ടിയാണ് കൊലപാതകം ആസൂത്രണം ചെയ്തത്.
പളുകിലെ വീട്ടിലേക്ക് വിളിച്ചു വരുത്തി കഷായത്തില് കീടനാശിനി കലര്ത്തി കൊടുക്കുകയായിരുന്നു.
ഇതേത്തുടര്ന്ന് ശാരീരിക അവശത നേരിട്ട ഷാരോണിനെ ആശുപത്രിയില് പ്രവേശിപ്പിച്ചെങ്കിലും 11 ദിവസത്തിനു ശേഷം മരിച്ചു.
ഫൊറന്സി ഡോക്ടര് പ്രത്യേക അന്വേഷണ സംഘത്തിന് നല്കിയ ശാസ്ത്രീയ തെളിവുകളാണ് കേസില് നിര്ണായകമായത്.
ഗ്രീഷ്മയുടെ അമ്മ സിന്ധുവിനെ വെറുതെ വിടരുതായിരുന്നുവെന്ന് ഷാരോണിന്റെ കുടുംബം പറഞ്ഞു.
ഇതിനെതിരെ ഹൈക്കോടതിയെ സമീപിക്കും എന്നും അവർ അറിയിച്ചു.
