ഇംഫാല്: മെയ്തേയ് സമുദായവും കുക്കി ഗോത്രവര്ഗക്കാരും തമ്മിലുള്ള വംശീയ കലാപം രൂക്ഷമായ മണിപ്പൂരിലേക്ക് 10,000 സൈനികരെ കൂടി കേന്ദ്ര സർക്കാർ നിയോഗിക്കും.ഇതോടെ മൊത്തം പട്ടാള കമ്പനികളുടെ എണ്ണം 288 ആവും.
2023 മേയ് മുതല് ഇതുവരെ മണിപ്പുര് കലാപത്തില് 258 പേര് മരിച്ചതായി മണിപ്പുര് സുരക്ഷാ ഉപദേഷ്ടാവ് കുല്ദീപ് സിങ് പറഞ്ഞു. ജനങ്ങളുടെ ജീവനും സ്വത്തും സംരംക്ഷിക്കുന്നതിനും ദുര്ബ്ബല പ്രദേശങ്ങളുടെ നിരീക്ഷണത്തിനുമാണ് സുരക്ഷാ സേനയെ അയയ്ക്കുന്നത്.
എല്ലാ പ്രദേശങ്ങളിലേക്കും നിരീക്ഷണം ദിവസങ്ങള്ക്കുള്ളില് വ്യാപിക്കും. എല്ലാ ജില്ലയിലും പുതിയ കോ-ഓര്ഡിനേഷന് സെല്ലുകളും ജോയിന്റ് കണ്ട്രോള് റൂമുകളും സ്ഥാപിക്കും.
വംശീയ സംഘര്ഷം ആരംഭിച്ചതിന് ശേഷം പോലീസ് ആയുധപ്പുരകളില് നിന്ന് കൊള്ളയടിച്ച ഏകദേശം 3,000 ആയുധങ്ങള് സേന ഇതുവരെ കണ്ടെടുത്തിട്ടുണ്ടെന്നും അദ്ദേഹം പറഞ്ഞു.
